ბელგიამ დაძაბულ ბრძოლაში სენეგალს სძლია და მსოფლიო ჩემპიონატის 1/8 ფინალში გავიდა

აშშ-ში, კანადასა და მექსიკაში მიმდინარე საფეხბურთო მსოფლიო ჩემპიონატის 1/32 ფინალში ბელგიის ეროვნულმა ნაკრებმა დაძაბულ ბრძოლაში სენეგალის გუნდი ანგარიშით 3:2 დაამარცხა და 1/8 ფინალში გავიდა.

მატჩის 24-ე წუთზე სენეგალელმა ჰაბიბ დიარამ ყველასთვის მოულოდნელად ტიბო კურტუას კარის აღება შეძლო და საკუთარი ნაკრები წინ გაიყვანა. შეხვედრის 51-ე წუთზე ისმაილა სარმა სენეგალელთა უპირატესობა ორ ბურთამდე გაზარდა.

ორი გაშვებული გოლის შემდეგ ბელგიის ნაკრები არ დანებდა და გულშემატკივარს მატჩის ზღაპრული დასასრული აჩვენა. ჯერ 86-ე წუთზე რომელუ ლუკაკუმ ორბურთიანი სხვაობა ერთ ბურთამდე შეამცირა. სამ წუთში იური ტილემანსმა ანგარიში გაათანაბრა. მატჩის ძირითადი 90 წუთი ფრედ 2:2 დასრულდა.

შეხვედრის მთავარმა არბიტრმა დამატებითი დრო დანიშნა. მეორე დამატებითი ტაიმის დამატებით დროში სენეგალელთა კარში თერთმეტმეტრიანი დაინიშნა, რომელიც იური ტილემანსმა ზუსტად შეასრულა და ბელგიელებს გამარჯვება მოუპოვა.

ბელგიელთა მეტოქე 1/8 ფინალში ტურნირის ერთ-ერთი მასპინძელი, აშშ-ის ეროვნული გუნდი იქნება.