ბიძინა გიორგობიანი: სამწუხაროდ, წინა ელჩის საქართველოში მუშაობის პერიოდში ძალიან დაზიანდა ქართულ - გერმანული ურთიერთობები. ამ ურთიერთობების გამოსწორებას გარკვეული პერიოდი დასჭირდება, თუმცა ვფიქრობ, რომ მაინც წავა იმ ისტორიული ურთიერთობისკენ, როგორიც გააჩნდათ გერმანიასა და საქართველოს ერთმანეთთან

ქართულ-გერმანული ურთიერთობების გამოსწორებას გარკვეული პერიოდი დასჭირდება, თუმცა ვფიქრობ, რომ მაინც წავა იმ ისტორიული ურთიერთობისკენ, როგორიც გააჩნდათ გერმანიასა და საქართველოს ერთმანეთთან, - განაცხადა „დღის ქრონიკასთან“ „ერთიანი ნეიტრალური საქართველოს“ პოლიტიკურმა მდივანმა ბიძინა გიორგობიანმა.

მისი თქმით, გერმანია ყოველთვის იყო საქართველოს მეგობარი ქვეყანა და ეს ურთიერთობები წინა ელჩმა საგრძნობლად დააზიანა.

„სამწუხაროდ, წინა ელჩის საქართველოში მუშაობის პერიოდში ძალიან დაზიანდა ქართულ - გერმანული ურთიერთობები. წინა ელჩი დანიშნული იყო გერმანიის ყოფილი საგარეო საქმეთა მინისტრის ანალენა ბერბოკის პერიოდში. ამ დაზიანებული ურთიერთობების გამოსწორებას გარკვეული პერიოდი დასჭირდება, მაგრამ მე იმედი მაქვს, რომ ეს მაინც წავა იმ ისტორიული ურთიერთობისაკენ, როგორიც გააჩნდათ გერმანიასა და საქართველოს ერთმანეთთან. გერმანია ყოველთვის იყო საქართველოს მეგობარი ქვეყანა ევროპის კონტინენტზე და თუკი ევროკავშირში ოდესმე შეიცვლება ის დამოკიდებულება, რომელიც დღეს მეფობს ბრიუსელში და შეიცვლება პოზიტიურისკენ, აქ გერმანია უკანასკნელ ადგილას არ იქნება იმ ქვეყნებში, რომლებსაც საქართველოსთან ექნებათ კარგი ურთიერთობა“, - განაცხადა ბიძინა გიორგობიანმა.

გერმანიაში საქართველოს საგანგებო და სრულუფლებიანმა ელჩმა ალექსანდრე კარტოზიამ გერმანიის ფედერალურ პრეზიდენტს, ფრანკ-ვალტერ შტაინმაიერს რწმუნებათა სიგელები გადასცა. პარალელურად კი დაახლოებით წლინახევრის შემდეგ, გერმანიის საგარეო საქმეთა სამინისტროს ვებგვერდიდან წაიშალა ის არასწორი მონაცემები, სადაც საქართველოს მოქმედ პრეზიდენტად სალომე ზურაბიშვილი იყო მოხსენიებული.