Bloomberg: დიდი ბრიტანეთი 500 კმ სიშორის ბალისტიკურ რაკეტებს შეიმუშავებს და უკრაინას მიაწვდის

სააგენტო Bloomberg-მა შეიტყო, რომ დიდმა ბრიტანეთმა, პროგრამა Nightfall-ის ფარგლებში, პირველი ბალისტიკური რაკეტის შესამუშავებლად რამდენიმე კომპანიასთან კონტრაქტი გააფორმა. ეს ნაბიჯი მიზნად ისახავს როგორც უკრაინის მხარდაჭერას, ისე ევროპის ამერიკულ იარაღზე დამოკიდებულების შემცირებას.

წყაროების ცნობით, ქვეყნის თავდაცვის სამინისტრომ გაამარტივა ტექნიკური მოთხოვნები, რათა დააჩქაროს შემუშავების პროცესი და იარაღი უკრაინას 2027 წელს გადასცეს.​ Nightfall-ში მონაწილე კომპანიებმა კი წარმატებით უნდა გაიარონ გამოცდები, სანამ რაკეტების წარმოებაზე კონტრაქტებს მიიღებენ.

რესპონდენტების თქმით, წინასწარი კონტრაქტები მარტამდე უნდა გაფორმებულიყო, თუმცა მათი გაფორმება დაახლოებით ორი თვით შეყოვნდა.

საცდელი გაშვებები 12 თვის განმავლობაში უნდა დაიწყოს, მიწოდება კი 2027 წლის ბოლოს. ჩვეულებრივ, ბალისტიკური რაკეტების შემუშავებას და ექსპლუატაციაში მიღებას ათწლეულზე მეტი დრო სჭირდება.