Bloomberg: ირანი სამხედრო პოტენციალის აღდგენისთვის საჭირო რაკეტებს, სავარაუდოდ, რუსეთისგან იღებდა

ირანმა რვაკვირიანი ცეცხლის შეწყვეტის რეჟიმის მოქმედების დროს საკუთარი სარაკეტო არსენალი აღადგინა და, სავარაუდოდ, ახალი შეიარაღება რუსეთისგან მიიღო. ინფორმაციას Bloomberg-ი დასავლეთის დაზვერვის სამსახურებზე დაყრდნობით ავრცელებს.

დაზვერვის ინფორმაციით, თეირანს ომამდელ პერიოდთან შედარებით შეიარაღების 75% დარჩა. მან მარაგების სწრაფად შევსება შეძლო და, სავარაუდოდ, ახლად გამოშვებული რუსული რაკეტები მიიღო.

აღნიშნული მონაცემები არ ემთხვევა აშშ-ის პრეზიდენტის დონალდ ტრამპის მიერ გაკეთებულ განცხადებას, რა დროსაც თეთრი სახლის ლიდერი ამტკიცებდა, რომ ირანს რაკეტების 21%-დან 22%-მდე მარაგი დარჩა. მარტში საუბარი 60%-ზე იყო.

როგორც Bloomberg-ი იუწყება, ზავამდე ირანმა 1 850 რაკეტა და „შაჰედის“ ტიპის ათასობით დრონი გაუშვა. გამშვები დანადგარების ნაწილი განადგურდა, მაგრამ ნანგრევების ქვეშ მოყოლილი კომპლექსებისა და იარაღის საწყობების გაწმენდა ირანმა უკვე მოასწრო.