CNN: აშშ-ის მაღალი რანგის ოფიციალური პირების განცხადებით, ტრამპმა ბოლო დღეებში პირად საუბრებში უკმაყოფილება გამოთქვა იმის გამო, რომ ინფორმაციის გაჟონვა აშშ-ის საბრძოლო მასალის მარაგების შემცირების შესახებ შეერთებულ შტატებს კრიტიკულ მომენტში სუსტად წარმოაჩენს

აშშ-ის მაღალი რანგის ოფიციალური პირების განცხადებით, პრეზიდენტმა დონალდ ტრამპმა ბოლო დღეებში პირად საუბრებში უკმაყოფილება გამოთქვა იმის გამო, რომ ინფორმაციის გაჟონვა აშშ-ის საბრძოლო მასალის მარაგების შემცირების შესახებ შეერთებულ შტატებს კრიტიკულ მომენტში სუსტად წარმოაჩენს, - წერს ტელეკომპანია CNN-ი.

განხილვების დეტალებში ჩახედული ექვსი წყაროს ცნობით, ეს თემა გასულ კვირას კემპ დევიდში გამართული კაბინეტის შეხვედრის მთავარი განხილვის საგანი იყო, სადაც უკმაყოფილო ტრამპმა მედიაში საბრძოლო მასალის დაბალი მარაგების გაშუქების საკითხი წამოჭრა.

ამ წყაროებიდან ბევრმა აღნიშნა, რომ ტრამპმა თვეებია კარგად იცის საბრძოლო მასალებთან დაკავშირებული ნებისმიერი პოტენციური პრობლემის შესახებ და ეს ცნობები მისთვის მოულოდნელი არ ყოფილა.

წყაროების თქმით, იგი განრისხებული იყო იმით, რომ ეს ინფორმაცია კონფლიქტის გარდამტეხ მომენტში გასაჯაროვდა და რომ იგი კვლავ რჩება მზარდ საჯარო თემად იმ დროს, როდესაც მას ძალის პოზიციის დემონსტრირება სურს.

„შეერთებულ შტატებს აქვს საბრძოლო მასალების უზარმაზარი რაოდენობა, განსაკუთრებით გარკვეული ტიპის“, - დაწერა ტრამპმა Truth Social-ზე ხუთშაბათს. „გარდა ამისა, დიდი რაოდენობით მასალა იწარმოება და საჭიროებისამებრ იგზავნება აშშ-ში. თავდაცვითი კომპანიები აშენებენ ქარხნებისა და საწარმოების ყველაზე დიდ რაოდენობას ჩვენი ქვეყნის ისტორიაში“.

მიუხედავად ამისა, ტრამპმა, როგორც ჩანს, აღიარა, რომ მარაგების შესახებ გავრცელებული ინფორმაციის, სულ მცირე, ნაწილი მაინც სიმართლეს შეესაბამებოდა. მან განაცხადა, რომ მისი ადმინისტრაცია „ხანგრძლივ პატიმრობას“ მოითხოვს მათთვის, ვინც ეს ინფორმაცია გაასაჯაროვა.