CNN: აშშ-სა და ირანს შორის სამშვიდობო მოლაპარაკებებისთვის გამოყოფილი 60-დღიანი ვადის უშედეგოდ ამოწურვის შემდეგ, მსოფლიო ბაზარზე ნავთობის ფასები ზომიერად იზრდება

აშშ-სა და ირანს შორის სამშვიდობო მოლაპარაკებებისთვის გამოყოფილი 60-დღიანი ვადის უშედეგოდ ამოწურვის შემდეგ, მსოფლიო ბაზარზე ნავთობის ფასები ზომიერად იზრდება - მხარეებმა ომის დასასრულებლად მდგრადი შეთანხმების მიღწევა ვერ შეძლეს, - წერს ტელეკომპანია CNN-ი.

Brent-ის ტიპის ნავთობის ფასი 0.38%-ით გაიზარდა და ბარელზე 88.85 დოლარი შეადგინა. რაც შეეხება ამერიკულ ეტალონს, WTI-ს (West Texas Intermediate), მისი ღირებულება პრაქტიკულად უცვლელი დარჩა და ბარელზე 82.42 დოლარს შეადგენს.

მას შემდეგ, რაც კონფლიქტის დასასრულებლად მიმართული დიპლომატიური ძალისხმევა შეფერხდა, Brent-ის ფასი აგვისტოს დასაწყისში დაფიქსირებული მინიმუმებიდან თითქმიდან 10 დოლარით გაიზარდა.

„შექმნილი სიტუაციიდან მარტივ გამოსავალს ვერ ვხედავთ“, - აღნიშნავს საინვესტიციო ბანკ Jefferies-ის მთავარი ეკონომისტი მოჰიტ კუმარი. - „ირანი არ დათმობს კონტროლს ჰორმუზის სრუტეზე, ხოლო აშშ არ დათანხმდება ისეთ გადაწყვეტას, რომლითაც ირანს შეეძლება მოსაკრებლის დაწესება და სრუტეში გემების გადაადგილების გაკონტროლება“.

შექმნილი სიტუაციის მიუხედავად, ნავთობის ფასი უკვე რამდენიმე თვეა ბარელზე 100 დოლარზე დაბალ ნიშნულზე ნარჩუნდება. კუმარის განმარტებით, ეს ნაწილობრივ იმით არის განპირობებული, რომ ჰორმუზის სრუტეში საზღვაო ნაოსნობის ინტენსივობა, სავარაუდოდ, აღემატება ოფიციალურ მონაცემებს.