CNN: ბრაუნის უნივერსიტეტის კვლევის თანახმად, ირანთან ომის დაწყების შემდეგ ბენზინსა და დიზელზე ფასების მკვეთრმა მატებამ ამერიკელ მომხმარებლებს 37 მილიარდი დოლარის ზარალი მიაყენა

ბრაუნის უნივერსიტეტის კვლევის თანახმად, ირანთან ომის დაწყების შემდეგ ბენზინსა და დიზელზე ფასების მკვეთრმა მატებამ ამერიკელ მომხმარებლებს 37 მილიარდი დოლარის ზარალი მიაყენა, - წერს ტელეკომპანია CNN-ი.

ორშაბათის მდგომარეობით, ხარჯების ეს ზრდა თითოეულ ოჯახზე 284 დოლარზე მეტს შეადგენს.

ეს მონაცემები ეყრდნობა „ირანის ომის ენერგოდანახარჯების ინდექსს“ (Iran War Energy Cost Tracker) - ბრაუნის უნივერსიტეტის მიერ წარმოებულ აღრიცხვას, რომელიც 28 თებერვალს ომის დაწყების შემდეგ ბენზინსა და დიზელზე დამატებით დანახარჯებს ითვლის.

ინდექსი მიმდინარე ფასებს ადარებს ომამდელ საპროგნოზო მაჩვენებელს, რომელიც ასახავს, თუ რა ეღირებოდა ენერგორესურსები კონფლიქტის არარსებობის შემთხვევაში.

ბრაუნის უნივერსიტეტის ინფორმაციით, ბენზინზე ფასების ზრდა - ომის დაწყებისას არსებული 2.98 დოლარიდან (გალონზე) ორშაბათისთვის 4.52 დოლარამდე - ამერიკელ მომხმარებლებს 20 მილიარდი დოლარი უჯდებათ.

დიზელი, რომელიც გადამწყვეტი საწვავია ფერმერების, გადამზიდავებისა და რკინიგზისთვის, 2022 წელს დაფიქსირებულ ისტორიულ მაქსიმუმს მხოლოდ 18 ცენტით ჩამორჩება.

დიზელი ამერიკელების ხარჯებს კიდევ 16.9 მილიარდ დოლარს ამატებს. ბრაუნის უნივერსიტეტში აცხადებენ, რომ დიზელის ხარჯების შეფასება მოიცავს როგორც პირდაპირ, ისე ირიბ გავლენას მომხმარებლებზე.