დავით მათიკაშვილი აქციის დარბევაზე: ევროკავშირის ელჩი და კონკრეტულად დანიის სახელმწიფო გამოირჩევა თითის ქნევით, შეგონებებით, მაშინ, როდესაც საკუთარ ქვეყანაში უშვებს იმ საზარელ მოცემულობას, რაც ყველამ იხილა

ევროკავშირის ელჩი და კონკრეტულად დანიის სახელმწიფო გამოირჩევა თითის ქნევით, შეგონებებით, მაშინ, როდესაც საკუთარ ქვეყანაში უშვებს იმ საზარელ მოცემულობას, რაც ყველამ იხილა,- განაცხადა საპროცედურო საკითხთა და წესების კომიტეტის თავმჯდომარემ დავით მათიკაშვილმა დანიაში, პოლიციის მხრიდან მშვიდობიანი აქციის მონაწილეების ხელკეტებით ცემასთან დაკავშირებით.

მისივე თქმით, კოპენჰაგენში მოქალაქეები წყნარად აპროტესტებდნენ, როცა მათ პოლიციელებმა ძაღლები მიუსიეს და ხელკეტებით უმოწყალოდ სცემეს.

„დანიაში საზოგადოებამ იხილა პოლიციის მხრიდან პროტესტანტების უმოწყალო ცემა. ისინი არც პარლამენტს წვავდნენ, არც პრეზიდენტის სასახლეს იღებდნენ შტურმით. ისხდნენ წყნარად, აპროტესტებდნენ და მათ გავეშებული ძაღლები მიუქსიეს და ხელკეტებით უმოწყალოდ სცემეს. ეს ყველაფერი იმ ფონზე, როდესაც საქართველოში მიმდინარე პროცესებზე, სხვადასხვა ქვეყანა, მათ შორის ევროკავშირის ელჩი და კონკრეტულად დანიის სახელმწიფო გამოირჩევა თითის ქნევით, შეგონებებით, მაშინ, როდესაც საკუთარ ქვეყანაში უშვებს იმ საზარელ მოცემულობას, რაც ყველამ იხილა. ამაზე პასუხია გასაცემი. სად მიდის ევროკავშირი?",- აღნიშნა მათიკაშვილმა.