დავით მათიკაშვილი: დგანან და განიხილავენ შავი ზღვის პოლიტიკას ევროკავშირთან მიმართებით და საქართველოს არ იწვევენ, მაშინ, როდესაც 7 ქვეყანაა, რომელსაც საერთოდ ზღვაზე გასასვლელი არ აქვს და საქართველო არის ერთადერთი უნიკალური შესაძლებლობა ამ ცენტრალური აზიის ქვეყნებისთვის, დაუკავშირდნენ დასავლეთს საქართველოს გავლით

საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი „დღის ქრონიკაში“ გამოეხმაურა ბრიუსელში გამართულ შეხვედრას, სადაც ევროკავშირის საგარეო საქმეთა მინისტრებმა შავი ზღვის რეგიონის მიმართ ევროპული კავშირის სტრატეგიული მიდგომის საკითხზე ისე იმსჯელეს, რომ საქართველო არ უხსენებიათ.

მისი თქმით, საქართველო არის ერთადერთი უნიკალური შესაძლებლობა ცენტრალური აზიის გარკვეული ქვეყნებისთვის, რათა დასავლეთს საქართველოს გავლით დაუკავშირდნენ.

„მდარე და უუნარო მცდელობა, სეგრეგაცია მოახდინონ, დაყონ ხელისუფლება და ხალხი, ფიასკოსთვის არის განწირული, რომელიც უკვე სახეზეა. მილიონ ორასი ათასზე მეტმა ადამიანმა დაუჭირა მხარი „ქართულ ოცნებას“ და კაია კალასი რომ გამობრძანდება და იტყვის, რომ ჩვენ ხალხს ვუჭერთ მხარს და არა ხელისუფლებასო, ამაზე დიდი აბსურდი შეიძლება არსებობდეს? მეორე მხრივ, რაზე საუბრობენ, დგანან მინისტრები და განიხილავენ შავი ზღვის პოლიტიკას ევროკავშირთან მიმართებით და საქართველოს არ იწვევენ, საქართველოს გარეშე განიხილავენ, მაშინ, როდესაც 7 ქვეყანაა, რომელსაც საერთოდ ზღვაზე გასასვლელი არ აქვს და საქართველო არის ერთადერთი უნიკალური შესაძლებლობა ამ ცენტრალური აზიის ქვეყნებისთვის, დაუკავშირდნენ დასავლეთს საქართველოს გავლით.

შუა დერეფანი, რომელიც დღევანდელი მოცემულობიდან გამომდინარე წარმოადგენს ერთადერთ სასიცოცხლო მნიშვნელობის ყველაზე სწრაფ, მშვიდობიან დამაკავშირებელს ეკონომიკური კავშირებისთვის ევროპასა და აზიაში. ამ დროს საქართველოს იგნორირებას ახდენენ. სასაცილოა ნამდვილად, მაგრამ უფრო მეტად სატირალი", - განაცხადა მათიკაშვილმა.