დავით მათიკაშვილი: სამწუხაროდ, არა ფაქტების, არამედ აღქმების შექმნა წარმოადგენს იმ ძირითად მიზანს, რასაც ჩვენ ვაკვირდებით ევრობიუროკრატიის მხრიდან და ეს მიზანი განპირობებულია იმ პოლიტიკური საჭიროებებით, რაც არაჯანსაღი დამოკიდებულების თვალსაზრისით გააჩნიათ საქართველოსთან მიმართებით

სამწუხაროდ, არა ფაქტების, არამედ აღქმების შექმნა წარმოადგენს იმ ძირითად მიზანს, რასაც ჩვენ ვაკვირდებით ევრობიუროკრატიის მხრიდან და ეს მიზანი განპირობებულია იმ პოლიტიკური საჭიროებებით, რაც არაჯანსაღი დამოკიდებულების თვალსაზრისით გააჩნიათ საქართველოსთან მიმართებით, - განაცხადა გადაცემაში „EURO ანატომია“ საპროცედურო საკითხთა და წესების საპარლამენტო კომიტეტის თავმჯდომარემ, დავით მათიკაშვილმა.

მან საზოგადოებას ე.წ. მოსკოვის მექანიზმის დოკუმენტთან დაკავშირებული ფაქტი შეახსენა.

„პოლონელი ქალბატონი იყო ჩამოსული დღენახევარი, შეხვდა საქართველოში შესაბამის ოფიციალურ პირებს და ჩასულმა, სულ რამდენიმე დღეში, ერთი კვირაც კი არ იყო გასული, რომ 100 გვერდზე მეტი დასკვნა გამოაცხო საქართველოსთან მიმართებით, სადაც ერთი სიტყვა არ არის სიმართლე. ეს რატომ? - იმიტომ, რომ ხვალ და ზეგ ვინმეს რომ დასჭირდეს საქართველოზე თავდასხმა, მოიშველიებენ „მოსკოვის მექანიზმის“ ე.წ. ამ დასკვნას, ტყუილებით აღსავსეს და იტყვიან, რომ აგერ, ბატონო, ჩვენ, თურმე დემოკრატიის უკუსვლასთან დაკავშირებით რომ ვამბობდით საქართველოზე, მართალი აღმოჩნდა“, - აღნიშნა მათიკაშვილმა.

ასევე, მან ისაუბრა, თუ რატომ ვერ ახდენენ გავლენას საქართველოზე ჩატარებულ, ემპირიულ სამეცნიერო კვლევების შედეგებზე გავლენას ევრობიუროკრატები.

„ის ოდიოზური ევროჩინოვნიკებიც კი, რომლებიც დღეს მართავენ, ან რომლებიც წარმოადგენენ გარე ძალების მარიონეტებს ევროკავშირში, ვერაფერს უშვრებიან იმ ობიექტურ მდგენელს, სადაც თვლადი ანგარიშით შესაძლებელია, გარკვეულ შედეგამდე მიხვიდე. აქ არის თუნდაც, სტრასბურგის სასამართლოს გადაწყვეტილებები ან საქართველოდან წასული სარჩელების რაოდენობა, აქ არის საზოგადოების განწყობა, კორუფციის ძალიან დაბალი დონე, რომელთა მიმართებითაც კვლევის ჩატარებისას, თვალს ვერ არიდებენ საქართველოში არსებულ სიტუაციას. აქ არის საზოგადოების თითოეული წევრის განწყობის შესაბამისი ეტიმოლოგიის შემოწმება. იმ მცირე ჯგუფის გარდა, მეხუთე კოლონას რომ წარმოადგენს, ფაქტობრივად, ყველა ხელისუფლების მომხრეა. ამ ყველაფერს ვერაფერს უშვრებიან, მაგრამ როგორც კი პოლიტიკურად სჭირდებათ საქართველოზე თავდასხმა, ამ ყველაფერს გვერდზე გასწევენ და საკუთარ დეგრადირებულ დღის წესრიგს ცდილობენ, რომ გაჰყვნენ“, - განაცხადა მათიკაშვილმა.