დავით სონღულაშვილი: პროექტი „ჩემი პირველი ნერგი“ 22 ოქტომბრიდან დაიწყება და ერთი თვის განმავლობაში მთელი ქვეყნის მასშტაბით განხორციელდება

მთავრობის ინიციატივით, პრემიერის 31 აგვისტოს განკარგულებით დაიწყო პროექტი „ჩემი პირველი ნერგი“, რომლის განხორციელებაში ჩართული არის ჩვენი სამინისტრო, განათლების სამინისტრო, თბილისის მერია და რეგიონების სამინისტრო, - განაცხადა გარემოს დაცვისა და სოფლის მეურნეობის მინისტრმა დავით სონღულაშვილმა გადაცემაში „დღის ქრონიკა“.

როგორც მინისტრმა აღნიშნა, პროექტი 22 ოქტომბრიდან დაიწყება და ერთი თვის განმავლობაში მთელი ქვეყნის მასშტაბით განხორციელდება.

„ეს არის საკმაოდ მასშტაბური პროექტი, რომელიც გულისხმობს, რომ საქართველოს მასშტაბით ყველა პირველკლასელმა დარგოს პირველი ნერგი, რომელიც ბავშვებს ბავშვობიდანვე გარემოზე ზრუნვას ასწავლის.

მნიშვნელოვანია პროექტის დაფინანსების წყარო. არსებობს გარემოს ზიანის ფონდი, სადაც კერძო სექტორი გარემოსთვის მიყენებული ზიანის შემთხვევაში აკეთებს გადარიცხვას, რომელიც გარემოს ზიანის აღდგენას უნდა მოხმარდეს. ზუსტად ამ ფორმით, ამ მოცემულობით, შესაძლებელი იქნება ერთი მხრივ შევძლოთ, რომ გარემოზე მიყენებული ზიანი აღდგეს და მეორე მხრივ, ჩვენს ახალგაზრდებს, ჩვენს შვილებს ბავშვობიდანვე ვასწავლოთ გარემოსადმი განსაკუთრებული დამოკიდებულება. პროექტი 22 ოქტომბრიდან დაიწყება. ეს არის ხის დარგვის საერთაშორისო დღე და ერთი თვის განმავლობაში მთელი საქართველოს მასშტაბით განხორციელდება“, - აღნიშნა მინისტრმა.