ექსპედიტორთა ასოციაციის პრეზიდენტი: ანაკლიის ღრმაწყლოვანი ნავსადგურის პროექტის განხორციელება ჩვენი ქვეყნისთვის მნიშვნელოვანია, თუნდაც ე.წ. „ლენდლორდის“ მოდელით

„ჩვენ, ექსპედიტორები, ყოველთვის ვგულშემატკივრობთ იმას, რომ ქვეყანაში რაც შეიძლება მეტი ახალი, თანამედროვე ინფრასტრუქტურა გვქონდეს“, - განაცხადა ექსპედიტორთა ასოციაციის პრეზიდენტმა გივი თხელიძემ.

მისი თქმით, ასოციაცია მიესალმება ანაკლიის ღრმაწყლოვანი ნავსადგურის მშენებლობას, მათ შორის მსოფლიოში ყველაზე ფართოდ აპრობირებული, ე.წ. „ლენდლორდის“ მოდელით აშენებასაც.

„ანაკლიის ღრმაწყლოვანი პორტი ჩვენნაირი დასაქმებული ადამიანებისთვის ერთ-ერთი უმნიშვნელოვანესი პროექტია და მის განხორციელებას, რა თქმა უნდა, ვემხრობით. თუნდაც ე.წ. „ლენდლორდის“ მოდელით რომ აშენდეს და სახელმწიფო უფრო მეტად იყოს ჩართული მის დაორგანიზებასა და დაფინანსებაში, ამას ექსპედიტორებიც, რა თქმა უნდა, მივესალმებით. სხვადასხვა მაგალითი იმასაც აჩვენებს, რომ მსგავსი გადაწყვეტილება კარგად აისახება ჩვენს ინდუსტრიაზე“, - აღნიშნავს გივი თხელიძე.

გივი თხელიძის განცხადებით, რიგითი ქართველებისთვის უპირატესია, რომ სტრატეგიულ თუ სხვა სახის ინფრასტრუქტურას თავად ქართველები აკონტროლებდნენ და იქ, უმეტესწილად, ადგილობრივი კადრები იყვნენ დასაქმებულები.