EURACTIV: ბრიუსელმა გააკრიტიკა აშშ-ის გადაწყვეტილება რუსულ ნავთობზე სანქციების გამონაკლისის რეჟიმის გახანგრძლივების შესახებ

ბრიუსელმა გააკრიტიკა აშშ-ის გადაწყვეტილება რუსულ ნავთობზე სანქციების გამონაკლისის რეჟიმის გახანგრძლივების შესახებ და გააფრთხილა, რომ ეს ნაბიჯი მხოლოდ გაზრდის მოსკოვის ფინანსურ შემოსავლებს ირანის ომის დაწყების შემდეგ. ინფორმაციას ამის შესახებ გამოცემა EURACTIV-ი ავრცელებს.

„ევროკავშირის თვალსაზრისით, ჩვენ არ მივიჩნევთ, რომ ახლა რუსეთზე ზეწოლის შესუსტების დროა“, - განუცხადა ჟურნალისტებს სამშაბათს ეკონომიკის საკითხებში ევროკომისარმა, ვალდის დომბროვსკისმა, პარიზში „დიდი შვიდეულის“ (G7) ფინანსთა მინისტრების შეხვედრის წინ.

„სინამდვილეში, სწორედ რუსეთია ის, ვინც სარგებელს იღებს ირანის ომითა და წიაღისეულ საწვავზე ფასების მატებით“, - დასძინა მან. „შესაბამისად, თუკი რამეა საჭირო, ეს ამ ზეწოლის კიდევ უფრო გაძლიერებაა“.

ეს განცხადება მოჰყვა აშშ-ის ხაზინის მდივნის, სკოტ ბესენტის მიერ ორშაბათს გაჟღერებულ გადაწყვეტილებას იმის შესახებ, რომ ვაშინგტონი 30 დღით გაახანგრძლივებს სანქციების გამონაკლისს იმ რუსულ ნავთობზე, რომელიც უკვე ზღვაში იმყოფება.