EURACTIV: გერმანიის სახელმწიფო ვალის აღების ღირებულება ბოლო 15 წლის განმავლობაში უმაღლეს ნიშნულამდე გაიზარდა იმის ფონზე, რომ აშშ-ირანის ომით გამოწვეული ენერგეტიკული შოკი ევროზონის უდიდეს ეკონომიკაში ინფლაციის შიშს აძლიერებს

გერმანიის სახელმწიფო ვალის აღების ღირებულება ბოლო 15 წლის განმავლობაში უმაღლეს ნიშნულამდე გაიზარდა იმის ფონზე, რომ აშშ-ირანის ომით გამოწვეული ენერგეტიკული შოკი ევროზონის უდიდეს ეკონომიკაში ინფლაციის შიშს აძლიერებს, - წერს გამოცემა EURACTIV-ი.

გერმანიის 10-წლიანი სახელმწიფო ობლიგაციების საპროცენტო განაკვეთი, რომელიც ევროზონისთვის საორიენტაციო ნიშნულს წარმოადგენს, სამშაბათს 3.19%-მდე გაიზარდა, ხოლო 30-წლიანი გერმანული სახელმწიფო ვალის განაკვეთმა 3.70%-ს მიაღწია, რაც ყველაზე მაღალი მაჩვენებელია 2011 წლის შემდეგ.

ვალის აღების ღირებულების მკვეთრი ზრდა გლობალური ობლიგაციების მასობრივი გაყიდვის ფონზე მოხდა, რაც ოთხშაბათს დილით მხოლოდ მცირედით შენელდა.

ეს პროცესი ასევე უკავშირდება მზარდ მოლოდინებს იმის შესახებ, რომ ევროპის ცენტრალური ბანკი ივნისის მომავალ სხდომაზე საპროცენტო განაკვეთებს გაზრდის, რათა მზარდი ინფლაცია შეაკავოს.

თებერვლის ბოლოს აშშ-ირანის ომის დაწყების შემდეგ, ევროპის ცენტრალურმა ბანკმა წინა ორ სხდომაზე განაკვეთები უცვლელად შეინარჩუნა.

„ეს ენერგეტიკული შოკი უფრო ხანგრძლივი აღმოჩნდა, ამიტომ ჩვენ ვშორდებით ჩვენს საბაზისო სცენარს“, - განუცხადა „ბუნდესბანკის“ პრეზიდენტმა, იოახიმ ნაგელმა Bloomberg Television-ს. - „ეს ნიშნავს, რომ შესაძლოა, გარკვეული ზომების მიღება მოგვიწიოს“.