ევროკავშირმა რუსეთის წინააღმდეგ სანქციების 21-ე პაკეტი შეათანხმა

ევროკავშირის ელჩებმა დღეს გამართულ შეხვედრაზე რუსეთის წინააღმდეგ სანქციების 21-ე პაკეტი შეათანხმეს. ინფორმაციას ევროკომისიის პრეზიდენტი ურსულა ფონ დერ ლაიენი სოციალურ ქსელ X-ში ავრცელებს.

„მივესალმები რუსეთის წინააღმდეგ სანქციების 21-ე პაკეტზე მიღწეულ შეთანხმებას. იმ დროს, როდესაც უკრაინამ სამხედრო ინიციატივა მოიპოვა, ჩვენი სანქციები კვლავაც ასუსტებს რუსეთის საომარი ძალისხმევის ეკონომიკურ საფუძვლებს“, - წერს ფონ დერ ლაიენი.

მისი განცხადებით, სანქციების ახალი პაკეტი დამატებით 32 რუსულ ბანკს შეეხება. ასევე, სიაში შეყვანილია კრიპტოვალუტის კომპანიები და ნავთობით ვაჭრობის პლატფორმები.

როგორც ფონ დერ ლაიენმა აღნიშნა, რუსულ ნავთობზე დაწესებული ფასის ზედა ზღვრის გადახედვა ერთი წლით შეჩერდება, რათა რუსეთის სამხედრო მანქანამ ბაზარზე არსებული რყევებით ვერ ისარგებლოს.

„პირველად ვაწესებთ სანქციებს იმ გემების წინააღმდეგ, რომლებიც რუსეთის „ჩრდილოვან ფლოტს“ ეხმარებიან. ასევე, მნიშვნელოვანი ნაბიჯი გადავდგით, რათა რუს სამხედროებს ევროკავშირის ტერიტორიაზე შესვლა ოფიციალურად აეკრძალოთ“, - დასძინა ევროკომისიის პრეზიდენტმა.

I welcome the agreement on the 21st sanctions package against Russia. At a time when Ukraine has built military momentum, our sanctions continue to weaken the economic foundations of Russia’s war effort. We’re adding 32 more Russian banks to our transaction ban list. As well… — Ursula von der Leyen (@vonderleyen) July 23, 2026