ევროკავშირმა სერბეთს „მართლმსაჯულების უკუსვლის“ მიზეზით ფულის გამოყოფა შეუჩერა
გაფართოების საკითხებში ევროკომისრის მარტა კოსის განცხადებით, ევროკავშირმა სერბეთისთვის ფინანსური დახმარების გამოყოფა შეაჩერა მანამ, სანამ ოფიციალური ბელგრადი ვენეციის კომისიის რეკომენდაციებს არ შეასრულებს. ინფორმაციას სერბული მედია ავრცელებს.
მედიის ცნობით, ევროკავშირი სერბეთისგან ითხოვს, რომ მან სასამართლო სისტემასა და პროკურატურაში რეფორმები გაატაროს.
„დღეის მდგომარეობით მართლმსაჯულების უკუსვლის გამო ჩვენ განვითარების გეგმით გათვალისწინებული ყველა გადარიცხვა შევაჩერეთ. სანამ ვითარება არ გამოსწორდება, სერბეთი ევროკავშირისგან ფინანსურ დახმარებას არ მიიღებს“, - ციტირებს მედია კოსს.
თუ სერბეთი ვენეციის კომისიის რეკომენდაციებს გაითვალისწინებს, ევროკომისია ამას შეაფასებს და საკუთარ გადაწყვეტილებას გადახედავს. ხოლო თუ ოფიციალური ბელგრადი უარს განაცხადებს, ან ისეთ ცვლილებებს განახორციელებს, რაც ევროკავშირს არ დააკმაყოფილებს, სახსრები სხვა ქვეყნებზე გადანაწილდება, - დასძინა ევროკომისარმა.
იმედი
წყარო: imedinews.ge