Financial Times: ევროკავშირი ვლადიმერ პუტინთან შესაძლო მომლაპარაკებლის თანამდებობაზე ანგელა მერკელს და მარიო დრაგის განიხილავს

ევროკავშირის წევრი სახელმწიფოების მთავრობები მსჯელობენ, შეძლებენ, თუ არა ევროპის ცენტრალური ბანკის ყოფილი პრეზიდენტი მარიო დრაგი და გერმანიის ექს-კანცლერი ანგელა მერკელი გახდნენ ბლოკის ოფიციალური წარმომადგენლები, რათა რუსეთის პრეზიდენტთან ვლადიმერ პუტინთან მოლაპარაკებები აწარმოონ. ინფორმაციას Financial Times-ს ავრცელებს.

გამოცემის ცნობით, ევროკავშირში სულ უფრო და უფრო მწიფდება აზრი, რომ რუსეთთან მოლაპარაკებების განახლება საჭიროა.

ევროკავშირის საგარეო საქმეთა მინისტრები მომავალ კვირას კვიპროსზე გასამართ სამიტზე თითოეულ კანდიდატურას დეტალურად განიხილავენ. ევროპას რუსეთის პრეზიდენტთან დიალოგის განახლების საქმეში მხარს უკრაინის პრეზიდენტი ვოლოდიმირ ზელენსკი და აშშ-ც უჭერენ.

გამოცემის ცნობით, აშშ-ის პრეზიდენტის დონალდ ტრამპის ადმინისტრაციას მთელი თავისი ყურადღება ახლო აღმოსავლეთში მიმდინარე საბრძოლო მოქმედებებზე აქვს გადატანილი. ვაშინგტონმა ევროპას აცნობა, რომ რუსეთთან დიალოგის აღდგენის საწინააღმდეგო არაფერი აქვს.

2022 წელს უკრაინაში პუტინის შეჭრის შემდეგ ბრიუსელმა მოსკოვთან დიალოგის არხები დახურა, თუმცა ახლა ბლოკი შიშობს, რომ აშშ-ის მიერ წარმოებული წარუმატებელი სამშვიდობო პროცესის ფონზე, რაც პუტინის ტერიტორიული მოთხოვნებით და კიევის უარით არის განპირობებული, ევროპა ყველა პროცესს ჩამოშორდება და ცუდი გარიგების დადების რისკს ქვეშ აღმოჩნდება.

როგორც Financial Times-ი წერს, დრაგისა და მერკელის გარდა ევროკავშირი მთავარი მომლაპარაკებლის თანამდებობაზე ფინეთის მოქმედ პრეზიდენტს ალექსანდრ სტუბს და ყოფილ პრეზიდენტს საული ნიინისტეს განიხილავს.