FT: ევროკავშირში განიხილავენ ვარიანტს, რომ რუსეთის წინააღმდეგ სანქციები აღარ მიიღონ „პაკეტებად“, რათა თავიდან აიცილონ ზოგიერთი სახელმწიფოს მხრიდან ვეტოს დადება

ევროპული ქვეყნები რუსეთის წინააღმდეგ სანქციების მიღების პროცესისადმი ახალ მიდგომას განიხილავენ. ამის მიზეზი კი ის ფაქტი გახდა, რომ საბერძნეთმა წინა მსხვილი პაკეტის დამტკიცება შეაფერხა თავისი სანაოსნო კომპანიისთვის გამონაკლისების დაშვების მოთხოვნით, - წერს Financial Times-ი წყაროებზე დაყრდნობით.

ერთ-ერთი იდეა, რომელიც პოპულარობას იძენს ევროკომისიასა და ყველაზე პროუკრაინულად განწყობილ ქვეყნებს შორის, მდგომარეობს იმაში, რომ სანქციები შეთანხმდეს და დაწესდეს ცალ-ცალკე ან მცირე თემატურ ჯგუფებად, ნაცვლად მსხვილი პაკეტებისა.

ოფიციალური პირების თქმით, ეს შეამცირებს სანქციების შეფერხების რისკს, რადგან ქვეყნებს მოლაპარაკებების დროს ვეტოს უფლების გამოყენების ნაკლები შესაძლებლობა ექნებათ.

FT-ის ერთ-ერთი თანამოსაუბრე აცხადებს, რომ გასულ კვირას მიღებული რუსეთის წინააღმდეგ სანქციების 21-ე პაკეტი შესაძლოა უკანასკნელი იყოს ასეთ ფორმატში. „ახლა სრულიად აშკარაა, რომ ეს მიდგომა აღარ მუშაობს“, - აღნიშნა მან.

რუსეთის წინააღმდეგ სანქციების ბოლო პაკეტის მიღებისას, რომელიც ერთ-ერთი ყველაზე მასშტაბური გახდა, ევროპულ ქვეყნებს დათმობაზე წასვლა მოუწიათ საბერძნეთთან, რომელიც ითხოვდა გამონაკლისს თავისი კომპანია Dynagas-ის გემებისთვის რუსული გათხევადებული ბუნებრივი აირის (LNG) გადაზიდვაში.