FT: უკრაინას ევროკავშირის ფულით უპილოტო საფრენი აპარატების ჩინური დეტალები შეძენის ნება დართეს

უკრაინა უპილოტო საფრენი აპარატებისთვის ჩინური კომპონენტები ევროკავშირისგან მიღებული კრედიტის სახსრებით შეძენას შეძლებს, - წერს Financial Times-ი წყაროებზე დაყრდნობით. გამოცემის თანამოსაუბრეების თქმით, კიევმა ამ მიზნებისთვის ევროკავშირისგან მიღებული პირველი, ექვსმილიარდიანი ტრანშის ნაწილის გამოყენების სპეციალური ნებართვა მიიღო.

როგორც გამოცემა აღნიშნავს, ეს გადაწყვეტილება ხაზს უსვამს ევროკავშირის თავდაცვის ინდუსტრიაში არსებულ პრობლემებს, ისევე როგორც ჩინეთის როლს რუსეთ-უკრაინის ომის ორივე მხარის მომარაგებაში.

ევროკავშირის კრედიტის პირობების თანახმად, ამ თანხით შესყიდული თავდაცვითი პროდუქცია უნდა მოდიოდეს ევროკავშირის ბაზრიდან, უკრაინიდან ან დამტკიცებული პარტნიორებიდან - მაგალითად, კანადიდან. გარდა ამისა, შესყიდვები არ უნდა „ეწინააღმდეგებოდეს ევროკავშირის უსაფრთხოებისა და თავდაცვის ინტერესებს“.

თუმცა, ამ წესებში არსებობს გამონაკლისი: უკრაინას შეუძლია მიმართოს ბრიუსელს ნებართვისთვის, რათა შეიძინოს საქონელი სხვა ქვეყნებში, თუ ასეთი პროდუქციის სწრაფად შესყიდვა შეუძლებელია იმ ქვეყნებში, რომლებიც ევროკავშირის პირობებს აკმაყოფილებენ.

აპრილში ევროკავშირმა უკრაინას 90 მილიარდი ევროს ოდენობის კრედიტის გამოყოფა დაუმტკიცა. ამ თანხიდან 60 მილიარდი ევრო იარაღის შესყიდვისა და წარმოებისთვის არის განკუთვნილი, დარჩენილი 30 მილიარდი კი ბიუჯეტის მხარდასაჭერად.