გერმანიის თავდაცვის მინისტრი ჯარების გაყვანის შესახებ აშშ-ის გადაწყვეტილებაზე: ევროპამ საკუთარი უსაფრთხოების დიდი ნაწილი თავად უნდა უზრუნველყოს

გერმანიის თავდაცვის მინისტრი, ბორის პისტორიუსი აშშ-ის ხელისუფლების მიერ გერმანიიდან 5 ათასი ამერიკელი სამხედროს გაყვანის გადაწყვეტილეაბას გამოეხმაურა და აღნიშნა, რომ ევროპელებმა საკუთარი უსაფრთხოების დიდი ნაწილი თავად უნდა უზრუნველყონ. ინფორმაციას Reuters-ი ავრცელებს.

„ამ მხრივ გერმანია სწორ გზას ადგას“, - განაცხადა პისტორიუსმა და ხაზი გაუსვა, რომ გერმანიის შეიარაღებული ძალები იზრდება და ქვეყნის ხელისუფლება შეიარაღების მსხვილ და სწრაფ შესყიდვებს აწარმოებს.

როგორც გამოცემა იუწყება, გუშინ აშშ-მა განაცხადა, რომ გერმანიიდან 5 ათასი ამერიკელი სამხედროს გაყვანას გეგმავს. პისტორიუსის განცხადებით, დღესდღეობით გერმანიაში თითქმის 40 ათასი ამერიკელი სამხედრო იმყოფება.