გიორგი გაბუნია: თუ რაიმე კითხვები აწუხებთ, არსებობს პასუხები, მაგრამ მათ არ სურთ პოლიტიკური პროცესი. ვფიქრობ, რომ არსებული ევროპული ბიუროკრატიის პირობებში, რთული იქნება საუბარი იმაზე, რომ ურთიერთობების გადატვირთვა მოხდეს

მზად ვართ პოლიტიკური დიალოგისთვის. თუ მათ რაიმე კითხვები აწუხებთ, არსებობს პასუხები, მაგრამ მათ არ სურთ პოლიტიკური პროცესი. რასაც ვხედავთ, მაფიქრებინებს, რომ არსებული ევროპული ბიუროკრატიის პირობებში, რთული იქნება საუბარი იმაზე, რომ ურთიერთობების გადატვირთვა მოხდეს, - განაცხადა „დღის ქრონიკასთან“ პარლამენტის კულტურის კომიტეტის თავმჯდომარემ და საზოგადოება „ქართულის“ ლიდერმა გიორგი გაბუნიამ.

მისი თქმით, ურთიერთობების გადატვირთვა ევროკავშირთან გონივრულ ვადებში შესაძლოა მოხდეს, თუმცა არა მოქმედი ბიუროკრატების პირობებში.

„ჩვენ მზად ვართ დიალოგისთვის. ევროპულობა და ევროპული ღირებულებები პირველ რიგში იმას გულისხმობს, რომ უნდა იყოს დიალოგი. ჩვენ მზად ვართ პოლიტიკური დიალოგისთვის. თუ მათ რაიმე კითხვები აწუხებთ, ამ კითხვებზე არსებობს პასუხები, მაგრამ არ უნდათ ეს. მათ არ უნდათ დიალოგი, არ უნდათ პოლიტიკური პროცესი. რასაც ვხედავთ, დესტრუქციული პოლიტიკა გრძელდება და ეს მაფიქრებინებს იმას, რომ არსებული ევროპული ბიუროკრატიის პირობებში, რა თქმა უნდა, რთული იქნება საუბარი იმაზე, რომ ურთიერთობების გადატვირთვა მოხდეს.

ძალიან მნიშვნელოვანია გავაგრძელოთ ჩვენი კურსი. გავაგრძელოთ მშვიდობის პოლიტიკა, ეკონომიკის განვითარების პოლიტიკა. პოლიტიკა, რომელიც ჩვენს ეროვნულ ინტერესებს ემსახურება, რომელიც ჩვენი საზოგადოებისთვის კეთილდღეობის მოტანას ემსახურება. ეს არის ჩვენი ამოცანა დღეს. როდესაც ჩაივლის ქარიშხლები, რომელიც დღეს მსოფლიოშია და კარგად ვხედავთ, როგორი უსამართლო და საშიში მსოფლიოს პირობებში გვიწევს ცხოვრება, რა თქმა უნდა, ჩვენ უნდა ვიყოთ მზად იმისთვის, რომ მოხდეს ურთიერთობების გადატვირთვა. გონივრულ პერიოდში ეს სრულიად შესაძლებელია, მაგრამ ძალიან მნიშვნელოვანია, რომ ჩვენ ამისთვის ვიყოთ მზად“, - განაცხადა გიორგი გაბუნიამ.