გიორგი კალანდარიშვილი: გვესმის ბრალდებები არჩევნების შესაძლო მანიპულაციასთან დაკავშირებით, თუმცა ვერც საერთაშორისო დონეზე ვერ მოვისმინეთ ისეთი მტკიცებულება, რომელიც რაიმენაირად დაადასტურებდა რომელიმე ბრალდების არსებობას
ჩვენ დისკუსიისა და დებატების ფარგლებში, ფაქტობრივად, დავფარეთ ყველა ის მნიშვნელოვანი საკითხი, რომელთან დაკავშირებითაც არსებობდა რაიმე წუხილები, თუ კითხვის ნიშნები, - განუცხადა „ქრონიკას“ პარიზში, ცესკოს თავმჯდომარემ, გიორგი კალანდარიშვილმა, რომელიც ევროსაბჭოს საპარლამენტო ასამბლეისა და ვენეციის კომისიის წარმომადგენლებთან ერთად გამართულ დებატებში მონაწილეობდა.
კალანდარიშვილმა დისკუსიაში საქართველოს ცენტრალური საარჩევნო კომისიის მიერ გაჟღერებულ საკითხებზე ისაუბრა.
„ჩვენ ვისაუბრეთ იმ გამოწვევებზე, როგორიც არის, მაგალითად, მიკერძოებული და პოლიტიკურად მოტივირებული დაკვირვების შემთხვევები. როგორიც არის ე.წ. ფეიკ დაკვირვების შემთხვევები, რომელსაც ეუთო არაერთ ანგარიშში აღნიშნავს კიდეც. ვისაუბრეთ იმ განვითარების გზებზე, რომელიც ჩვენი ინსტიტუციის კომპეტენციის ფარგლებში შეიძლება არსებობდეს.
რა თქმა უნდა, საუბარი გვქონდა, 2024 წლის არჩევნების ჭრილში სხვადასხვა გარემოებასთან დაკავშირებით და ჩვენ დისკუსიისა და დებატების ფარგლებში, ფაქტობრივად, დავფარეთ ყველა ის მნიშვნელოვანი საკითხი, რომელთან დაკავშირებითაც არსებობდა რაიმე წუხილები, თუ კითხვის ნიშნები.
ბოლო ორი წელია, გვესმის უსაფუძვლო ბრალდებები არჩევნების შესაძლო მანიპულაციასთან დაკავშირებით, თუმცა ვერც ადგილობრივ და ვერც საერთაშორისო დონეზე ჩვენ ვერ ვნახეთ და ვერ მოვისმინეთ ისეთი მტკიცებულება, რომელიც რაიმენაირად დაადასტურებდა, რომელიმე ამ ბრალდების არსებობას“, - აღნიშნა გიორგი კალანდარიშვილმა.
იმედი
წყარო: imedinews.ge