გიორგი ფუტკარაძე: სანქციები „იმედის“ წინააღმდეგ ერთ რამეს ამტკიცებს, ჩვენს კრიტიკულ კითხვებზე პასუხები არ არსებობს. როდესაც უსამართლობაზე პასუხებს ითხოვს ან კრიტიკულ რეპორტაჟებს ამზადებს, გარე აქტორები არხის შეზღუდვას იწყებენ

სანქციები „იმედის“ წინააღმდეგ ერთ რამეს ამტკიცებს, ჩვენს კრიტიკულ კითხვებზე პასუხები არ არსებობს, - განაცხადა გადაცემა „იმედი LIVE“-ის წამყვანმა გიორგი ფუტკარაძემ.

მისი თქმით, როდესაც „იმედი“ უსამართლობაზე პასუხებს ითხოვს ან კრიტიკულ რეპორტაჟებს ამზადებს, გარე აქტორები არხის შეზღუდვას იწყებენ.

„კრიტიკული კითხვების დასმის გამო საქმიანობის აკრძალვა ერთი წლით. ეს არის ევროპარლამენტის გადაწყვეტილება მას შემდეგ, რაც „იმედმა“ სააკაშვილის მეგობარ ევროდეპუტატ რასა იუკნევიჩიანესთან კითხვების დასმა სცადა. იუკნევიჩიანეს პასუხები არ აღმოაჩნდა, თუ რის საფუძველზე ჩაწერა რეზოლუციაში ჩვენი არხის სანქცირების მოთხოვნა და რა არგუმენტები ჰქონდა შაბლონური ბრალდებების მიღმა, თუმცა შეძლო რომ შემდეგი ერთი წელი „იმედს“ ევროპარლამენტში შესვლა შეეზღუდა.

ამ პროცესის პარალელურად, მოლდოვამ სამ ქართულ მაუწყებელს განმარტებების გარეშე აკრედიტაციაზე უარი უთხრა. „იმედი“, „რუსთავი 2“ და „პოსტივი“ ვერ გააშუქებენ ევროპის საბჭოს მინისტრთა კომიტეტის 135-ე სესიას, სადაც საქართველოს საგარეო საქმეთა მინისტრიც იქნება წარმოდგენილი.

რა გახდა უარის მიზეზი, ტრადიციულად შაბლონური პასუხი მივიღეთ. ფაქტი ერთია, როცა „იმედი“ უსამართლობაზე პასუხებს ითხოვს ან კრიტიკულ რეპორტაჟებს ამზადებს, გარე აქტორები ჩვენი არხის შეზღუდვას იწყებენ“, - აღნიშნა გიორგი ფუტკარაძემ.

მედიის თავისუფლების შეზღუდვა - ევროპარლამენტმა ტელეკომპანია „იმედს” საქმიანობა 1 წლით აუკრძალა. მოლდოვამ კი სამ ქართულ მაუწყებელს აკრედიტაციაზე უარი განმარტების გარეშე უთხრა.