გიორგი ქაჯაია: ბრიუსელმა შესაძლოა, ჩათვალოს, რომ საქართველოს გეოგრაფიულად პატარა ქვეყანაა, მაგრამ იმის მიხედვით, რაც დღეს მსოფლიოში ხდება, გეოპოლიტიკურად ძალიან დიდი მოთამაშეა, სწორედ თავისი გეოგრაფიული მდებარეობიდან გამომდინარე

ბრიუსელმა შესაძლოა, ჩათვალოს, რომ საქართველოს გეოგრაფიულად პატარა ქვეყანაა, მაგრამ იმის მიხედვით, რაც დღეს მსოფლიოში ხდება, გეოპოლიტიკურად ძალიან დიდი მოთამაშეა, სწორედ თავისი გეოგრაფიული მდებარეობიდან გამომდინარე, - განაცხადა ანალიტიკოსმა გიორგი ქაჯაიამ გადაცემაში „დღის ქრონიკა“.

მან საქართველოს ლოჯისტიკის, ანაკლიის პორტის, ასევე მშვიდობის მნიშვნელობაზეც გაამახვილა ყურადღება.

„საქართველო არის ერთ-ერთი უმნიშვნელოვანესი თავისი ლოჯისტიკით, თავდაცვით, ისევ და ისევ მდებარეობიდან გამომდინარე. ეკონომიკურადაც არანაკლებ საჭიროა საქართველოს ევროკავშირისათვის, ვიდრე ჩვენთვის არის მნიშვნელოვანი პარტნიორი ევროკავშირი. აქედან გამომდინარე, ევროკავშირის თითოეულ წევრ სახელმწიფოს, თითოეულ იმ პოლიტიკურ მოთამაშეს, რომელიც აცნობიერებს გეოპოლიტიკურ და რესურსების გადანაწილებას, თუ ვინმეს ჯერ კიდევ პრაგმატული უნარი შერჩა, საქართველოსთან პარტნიორული ურთიერთობისთვის უნდა ემზადებოდნენ.

როდესაც გაიხსნება და სრული დატვირთვით იმუშავებს ანაკლიის პორტი, ეს აისახება საქართველოს თითოეულ მოქალაქეზე და სწორედ ეს იქნება ეკონომიკური ზრდის ერთ-ერთი მთავარი მაჩვენებელი. უბრალოდ, ამას დასჭირდება რამდენიმე წელიწადი. ჩვენ ვხედავთ, ახალი ინვესტიციები ყოველწლიურად შემოდის საქართველოში, ბევრი ინვესტორი დაინტერესდა საქართველოთი. ინტერესდებიან იმიტომ, რომ საქართველო იქცა მშვიდობის ერთ-ერთ კუნძულად მთელს რეგიონში”, - განაცხადა გიორგი ქაჯაიამ.