გიორგი სოსიაშვილი „იმედის“ „წაღების“ შესახებ დევდარიანის განცხადებაზე: გაიხსენონ ჩვენი უახლესი ისტორიის ის ამაზრზენი ფურცლები, როდესაც მედია საშუალებები მიწასთან იყო გასწორებული და სიტყვის თავისუფლება დახშული იყო

განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილე, საპარლამენტო უმრავლესობის წევრი, გიორგი სოსიაშვილი „იმედის“ „წაღების“ შესახებ ქეთევან დევდარიანის განცხადებას მედიასთან გამოეხმაურა. სოსიაშვილმა დევდარიანის განცხადებას აბსურდი და დიდი სიცრუე უწოდა.

„გაიხსენონ ჩვენი უახლესი ისტორიის ის ამაზრზენი ფურცლები, როდესაც სპეცდანიშნულების რაზმი შევარდა „იმედში“, დაარბიეს,აპარატურა დალეწეს და ქართული მედია საშუალებები მიწასთან იყო გასწორებული, სიტყვის თავისუფლება დახშული იყო.

ახლა ლაპარაკია ამ ფსევდოლიბერალების, პროპაგანდისტების მხრიდან რაღაც „იმედის“ წართმევაზე და თავისუფალი სიტყვის დევნაზე, ეს არის აბსურდი და დიდი სიცრუე, რომელიც საქართველოში აღარ იყიდება“, - აღნიშნა გიორგი სოსიაშვილმა.

ქეთი დევდარიანმა ერთ-ერთი ტელევიზიის ეთერში განაცხადა, რომ „ნაცმოძრაობის“ რეჟიმის მიერ წართმეული ტელეკომპანია „იმედის" კანონიერი მფლობელისთვის დაბრუნება არხის „წაღება“ იყო.