გიორგი ვოლსკი ოპოზიციაში დაპირისპირებაზე: ახალი „ნაცმოძრაობის“ ფორმულა შესთავაზეს გვარამიამ, მელიამ, სხვებმა საზოგადოებას და აი, ეს ჭიდილი მიმდინარეობს, თორემ არც ერთი და არც მეორე მხარის არსი და საკითხების მიმართ დამოკიდებულება არ შეცვლილა

ახალი „ნაცმოძრაობის“ ფორმულა შესთავაზეს გვარამიამ, მელიამ, სხვებმა საზოგადოებას და აი, ეს ჭიდილი მიმდინარეობს, - განაცხადა საქართველოს პარლამენტის თავმჯდომარის პირველმა მოადგილემ გიორგი ვოლსკიმ.

მან ასე შეაფასა ოპოზიციაში არსებული დაპირისპირება.

„არც ერთი და არც მეორე მხარის არსი და საკითხების მიმართ დამოკიდებულება არ შეცვლილა. განსხვავება მხოლოდ იმაშია, ვინ უფრო მეტ რესურსს ფლობს - ადამიანები, ვისაც სააკაშვილის ბანერი უჭირავს ხელში, თუ ადამიანები, რომლებიც სააკაშვილისგან გამიჯვნას ცდილობენ. მაგრამ ყველას ერთნაირად აქვს სისხლში გასვრილი ხელი - თუ პირდაპირ არა, საკუთარი მხარდაჭერით მაინც", - განაცხადა ვოლსკიმ.

ნიკა გვარამია მიხეილ სააკაშვილს ტყუილში ამხელს. პატიმარ სააკაშვილის ბრალდებას ნიკანორ მელიას წინააღმდეგ, გვარამია კრიტიკით ეხმაურება. მისი თქმით, რევოლუციას ერთი ადამიანი ვერ ახდენს და ეს 2003 წელს, ვარდების რევოლუციის დროს ერთპიროვნულად არც სააკაშვილს გაუკეთებია.