იენს სტოლტენბერგი: დღევანდელი ნატო აშშ-ის გარეშე ვერ გადარჩება. არ მჯერა, რომ ევროკავშირს ნატოს ჩანაცვლება შეუძლია

ნატოს ყოფილი გენერალური მდივანი იენს სტოლტენბერგი ამბობს, რომ ჩრდილოატლანტიკური ალიანსი აშშ-ის გარეშე ვერ გადარჩება და რომ ევროკავშირი ვერ შეასრულებს ნატოს როლს.

ერთ-ერთ გადაცემაში სტუმრობისას სტოლტენბერგმა, რომელიც ამჟამად ნორვეგიის ფინანსთა მინისტრის პოსტს იკავებს, აღნიშნა, რომ ალიანსი იმ სახით, რა სახითაც ის დღეს არსებობს, აშშ-ის გარეშე ვერ გადარჩება.

„ვერ გადარჩება ის ნატო, რომელსაც ჩვენ თითქმის 80 წელია ვიცნობთ, რადგან მისი არსი სწორედ ევროპისა და შეერთებული შტატების ერთობლიობაში და ყველა საფრთხის წინაშე ერთად დგომაშია. სწორედ ამიტომ არის ასეთი მნიშვნელოვანი, რომ ყველაფერი გავაკეთოთ ევროპისა და შეერთებული შტატების დაშორების თავიდან ასაცილებლად“, - განაცხადა სტოლტენბერგმა.

მან ევროპასა და აშშ-ის ურთიერთობების დაძაბვის ფონზე ე.წ. ევროკავშირის არმიის შექმნის შესახებ გაჟღერებული მოწოდებები სკეპტიკურად შეაფასა.

„დიდ პატივს ვცემ ევროკავშირს, მაგრამ არ მჯერა, რომ მას ნატოს ჩანაცვლება შეუძლია, როდესაც საქმე ეხება კოლექტიურ უსაფრთხოებასა და თავდაცვის გარანტიებს“, - დასძინა სტოლტენბერგმა.

მისივე თქმით, ნატოს მომავალზე ზედმეტი სპეკულაციები არ უნდა არსებობდეს. „მოსკოვში არ უნდა არსებობდეს არანაირი გაურკვევლობა იმის შესახებ, რომ ჩვენ მზად ვართ ერთმანეთი დავიცვათ“, - აღნიშნა სტოლტენბერგმა.