ირაკლი ბათიაშვილი 2011 წლის 26 მაისზე: სამწუხაროდ, ეს დღე აღმოჩნდა „ნაციონალური მოძრაობის“ რეჟიმის მიერ 26 მაისის დიადი თარიღის შებღალვა, შეურაცხყოფის მიყენება იმ ქმედებით, რაც მათ ჩაიდინეს არაადამიანური სისასტიკით

სამწუხაროდ, ეს დღე აღმოჩნდა „ნაციონალური მოძრაობის“ რეჟიმის მიერ 26 მაისის დიადი თარიღის შებღალვა, შეურაცხყოფის მიყენება იმ ქმედებით, რაც მათ ჩაიდინეს არაადამიანური სისასტიკით, - განაცხადა გადაცემაში „დღის ქრონიკა“ ფილოსოფოსმა, თბილისის სახელმწიფო უნივერსიტეტის პროფესორმა ირაკლი ბათიაშვილმა 2011 წლის 26 მაისზე საუბრისას.

მისივე თქმით, 2011 წლის 26 მაისის აქციაზე მდგომი დემონსტრანტები აბსოლუტურად მშვიდად გამოხატავდნენ საკუთარ პოზიციას, რა დროსაც „ნაციონალური მოძრაობის“ რეჟიმმა მათ სასაკლაო მოუწყო.

„ეს იყო სადამსჯელო ოპერაცია და მე ასეთი რამ საერთოდ არ მინახავს არც ერთ აქციაზე. საკუთარ ხალხს მოუწყო ხელისუფლებამ ეს ოპერაცია, როდესაც ოთხივე მხრიდან ჩაკეტეს იმისთვის, რომ იქ ცემით მოეკლათ ხალხი. დარბევის შედეგად ორი ადამიანი გარდაიცვალა. ერთი ცინიკურად მეტროს თავზე შემოაგდეს, რომ ვითომ დენის დარტყმით გარდაიცვალა, ყველამ იცის, რომ ის მოკლეს. ერთი ადამიანი დაბრმავდა ცალი თვალით, უამრავი ადამიანი სასტიკად იყო ნაცემი.

26 მაისის შემდეგ ადმინისტრაციული წესით ხომ უამრავი დააპატიმრეს, მაგრამ კიდევ დაახლოებით 20-მდე ადამიანი დააპატიმრეს სისხლის სამართლის პასუხისმგებლობით, მძიმე მუხლებით. მეორე დღეს იყო ცეკვა-თამაში, აღნიშვნა, მუსიკა იმ სისხლიან რუსთაველის გამზირზე“, - განაცხადა ირაკლი ბათიაშვილმა.