ირანის საგარეო საქმეთა მინისტრი: ჰორმუზის სრუტე ომამდელ რეჟიმს აღარ დაუბრუნდება

ირანის საგარეო საქმეთა მინისტრის, აბას არაღჩის განცხადებით, ჰორმუზის სრუტის მართვა ომამდელ ფორმატს აღარ დაუბრუნდება. მინისტრმა ხაზგასმით აღნიშნა, რომ ეს სტრატეგიული სანაოსნო გზა თეირანის ერთ-ერთი ყველაზე მნიშვნელოვანი შემაკავებელი ინსტრუმენტია და იგი ამჟამად ირანისა და ომანის სუვერენიტეტის ქვეშ იმყოფება.

ცვლილებები შეეხება სრუტით სარგებლობის წესებსაც. არაღჩის განმარტებით, მიუხედავად იმისა, რომ ჰორმუზის სრუტე მრავალი წლის განმავლობაში უფასო იყო, ეს რეჟიმი სრულდება და ამიერიდან გავლისა და სხვა სერვისებისთვის საფასური დაწესდება.

მინისტრმა აღნიშნა, რომ თუ ურთიერთგაგების მემორანდუმით გათვალისწინებული პირობები არ შესრულდება, საბოლოო შეთანხმებაზე მოლაპარაკებები არ გაიმართება. მისი თქმით, მეორე მხარის ბუნება ვალდებულებების დარღვევაა, რადგან ისინი იმპლემენტაციის პროცესში ათას და ერთ პრობლემას ქმნიან, ირანს კი ამის დიდი გამოცდილება აქვს.

სიტყვით გამოსვლისას საგარეო საქმეთა მინისტრმა კიდევ ერთხელ გააჟღერა თეირანის პოზიცია რეგიონულ კონფლიქტთან დაკავშირებით და აღნიშნა, რომ ისრაელმა ძალები სამხრეთ ლიბანიდან უნდა გაიყვანოს.