ირანის საგარეო საქმეთა მინისტრის მოადგილე: აშშ-ის დარტყმები სამშვიდობო შეთანხმების უხეში დარღვევაა

ირანის საგარეო საქმეთა მინისტრის მოადგილემ სამართლებრივ და საერთაშორისო საკითხებში, ქაზემ ღარიბაბადიმ სოციალურ ქსელში გაავრცელა განცხადება, რომლითაც აშშ-ის მიერ განხორციელებულ სამხედრო დარტყმებს ეხმაურება.

ღარიბაბადის თქმით, ვაშინგტონის გადაწყვეტილება ირანული ნავთობის გაყიდვის უფლების ლიცენზიის გაუქმების შესახებ „ისლამაბადის ურთიერთგაგების მემორანდუმის“ მე-10 მუხლის „უხეში დარღვევაა“.

ამასთან, ირანელი დიპლომატის განცხადებით, საჰაერო დარტყმები წარმოადგენს აღნიშნული შეთანხმების 1-ლი და მე-2 მუხლების „სერიოზულ დარღვევას“. შეთანხმება, რომელიც მიზნად ომის დასრულებას ისახავდა, მხარეებმა გასულ თვეში გააფორმეს.

განცხადების ბოლოს ქაზემ ღარიბაბადიმ ხაზგასმით აღნიშნა, რომ ირანი „გადამწყვეტ ზომებს მიიღებს საკუთარი ეროვნული ინტერესებისა და უსაფრთხოების დასაცავად“.