ჯანდაცვის მინისტრი მიხეილ სარჯველაძე მცხეთაში 26 მაისისადმი მიძღვნილ საზეიმო ღონისძიებებს დაესწრო
მცხეთაში 26 მაისის საზეიმო თარიღი განსაკუთრებული მასშტაბით აღინიშნა, რაც ქვეყნის გაქრისტიანებიდან 1700 წლის საიუბილეო თარიღსაც უკავშირდება, - ინფორმაციას ჯანდაცვის სამინისტრო ავრცელებს.
უწყების ცნობით, ისტორიულ დედაქალაქში მიმდინარე საზეიმო ღონისძიებებს ჯანდაცვის მინისტრი მიხეილ სარჯველაძე მოადგილე ირინე წაქაძესთან, სამინისტროს დაქვემდებარებული უწყების ხელმძღვანელ პირებთან, თანამშრომლებთან და ადგილობრივი ხელისუფლების წარმომადგენლებთან ერთად დაესწრო.
„მინისტრი ადგილზე გაეცნო თავდაცვის ძალების სამხედრო ტექნიკას, შეხვდა ბავშვების ზონაში შეკრებილ პატარებს და სამინისტროს მიერ მოწყობილი საგამოფენო სივრცეები დაათვალიერა. განსაკუთრებული ყურადღება დაეთმო საგანგებო სიტუაციების კოორდინაციისა და გადაუდებელი დახმარების ცენტრის კუთხეს, სადაც წარმოდგენილი იყო თანამედროვე რეანიმობილი და სამედიცინო მოტოტრანსპორტი, პარალელურად - მოქალაქეებისთვის პირველადი დახმარების აღმოჩენის საჩვენებელი სწავლება მიმდინარეობდა.
მიხეილ სარჯველაძემ მოსახლეობას დამოუკიდებლობის დღე და საქართველოს გაქრისტიანებიდან 1700 წლის საიუბილეო თარიღი მიულოცა. ჯანდაცვის მინისტრმა აღნიშნა, რომ წელს ეს დღესასწაული მთელი ქვეყნის მასშტაბით კიდევ უფრო გამორჩეულია, რადგან ორ მნიშვნელოვან ისტორიულ მოვლენას აერთიანებს.
მცხეთაში განსაკუთრებული საზეიმო განწყობით აღინიშნა საქართველოს დამოუკიდებლობის გამოცხადების ზუსტი დრო - 17:10 საათი, როდესაც შეკრებილმა საზოგადოებამ, ანსამბლ „ალილოსთან“ ერთად, სახელმწიფო ჰიმნი შეასრულა. დამოუკიდებლობის დღისადმი მიძღვნილი მრავალფეროვანი პროგრამა დასკვნითი კონცერტით დასრულდა“, - აღნიშნულია გავრცელებულ ინფორმაციაში.
