ჯორჯ ბიბი: სავაჭრო და ენერგო რესურსების ხაზები ჩინეთთან გეოპოლიტიკური დაპირისპირების მნიშვნელოვანი შემადგენელია. ამ თვალსაზრისით ვაშინგტონის გადმოსახედიდან სამხრეთ კავკასიის სახელმწიფოებს მნიშვნელოვანი როლის შესრულება შეუძლიათ

სავაჭრო და ენერგო რესურსების ხაზები ჩინეთთან გეოპოლიტიკური დაპირისპირების მნიშვნელოვანი შემადგენელია. ამ თვალსაზრისით ვაშინგტონის გადმოსახედიდან სამხრეთ კავკასიის სახელმწიფოებს მნიშვნელოვანი როლის შესრულება შეუძლიათ, - განაცხადა გადაცემაში „თბილისის დროით“ ქუინსის ინსტიტუტის ვიცე-პრეზიდენტმა და დიდი სტრატეგიების დირექტორმა ჯორჯ ბიბიმ.

გადაცემის წამყვანმა, ბრიტანელმა დიპლომატმა, გლობალური კრიზისების მართვის ექსპერტმა იან პრაუდმა ისაუბრა „მეგობარი აქტზე“ და ასევე აშშ-ის პრეზიდენტის ჩინეთში ვიზიტსაც შეეხო.

„მეგობარი ამხანაგს ნიშნავს ქართულად და ამ სახელწოდების მიუხედავად, კანონპროექტი სანქციებს გულისხმობს. ჩვენ ბევრი ვისაუბრეთ ევროპული სტრატეგიის თაობაზე, ამავე დროს, მაპატიე, მაგრამ ამერიკული ნაბიჯები ირანის წინააღმდეგ ომში, ასევე არ ტოვებს კარგი სტრატეგიის შთაბეჭდილებას.

ტრამპი ახლახან ჩინეთში იყო. სამხრეთ კავკასიის სახელმწიფოებთან დაკავშირებით ის საკმაოდ დაბალანსებული პოლიტიკის მატარებელია. ვგულისხმობ, სომხეთსა და აზერბაიჯანს შორის შუამავლობას და ე.წ. ტრამპის დერეფანსაც. საქართველოს თაობაზე კი ჩუმად არის, მიუხედავად იმისა, რომ კონგრესში საქართველოს ხელისუფლების სანქციების თაობაზეც იყო საუბარი. როგორ გგონია, ეს მხოლოდ ენერგორესურსების შესახებ წარმოებული საგარეო პოლიტიკაა? კასპიის ზღვასთან დაკავშირების მცდელობა, თუ უფრო დიდ სურათს ხედავ ტრამპის ადმინისტრაციის პირობებში, როდესაც საქმე ისეთ რთულ გეოპოლიტიკურ გზაჯვარედინს ეხება, როგორიც სამხრეთ კავკასიაა?“, - მიმართა პრაუდმა სტუმარს.

ჯორჯ ბიბის თქმით, პოლიტიკის განმსაზღვრელი გარკვეულწილად ენერგიის საკითხია.

„ეს კი უკვე ჩინეთთან არის კავშირში. ეს არის დიდი გეოპოლიტიკური სურათის შემადგენელი. ვაშინგტონი ცდილობს, რეგიონში მიწოდების ხაზები შექმნას, გამართოს სატრანსპორტო დერეფნები, რომლებიც იქნებიან კონკურენტები ან ალტერნატივა ჩინეთის ერთი სარტყლის ეკონომიკური ინიციატივისა. სავაჭრო და ენერგო რესურსების ხაზები ჩინეთთან გეოპოლიტიკური დაპირისპირების მნიშვნელოვანი შემადგენელია. ამ თვალსაზრისით ვაშინგტონის გადმოსახედიდან სამხრეთ კავკასიის სახელმწიფოებს მნიშვნელოვანი როლის შესრულება შეუძლიათ. ეს ასევე კავშირშია დიდ სახელმწიფოებს შორის თამაშის წესების განსხვავებულ აღქმასთან. ცივი ომის შემდგომ ამერიკის შეერთებული შტატები არ აღიარებდა რუსეთის მიერ საკუთარ საზღვრებთან, სამეზობლოში გავლენის სფეროების ფლობის უფლებას. ჩვენ ეს არ მიგვაჩნდა ლეგიტიმურად და რუსეთის ე.წ. წითელ ხაზებს და უსაფრთხოების გამოწვევებს პატივს არ ვცემდით.