ხმაური პარლამენტში - გახარიას პარტიის წევრების ბრალდებებს, რომ „ქართული ოცნება“ „ნაცებს“ დაემსგავსა, მმართველი გუნდის წევრებმა უპასუხეს და ფრაქცია „საქართველოსთვის“ დეპუტატებს მათ რიგებში მყოფ „ყოფილ ნაცებზე“ მიუთითეს

ხმაური პარლამენტში - ფრაქცია „საქართველოსთვის“ დეპუტატების, სოფო ხორგუანისა და გიორგი შარაშიძის გამოსვლას მმართველი პარტიის წევრები მხრიდან საპასუხო განცხადებები მოჰყვა.

ფრაქციის დეპუტატები გორში მომხდარ ფაქტთან დაკავშირებით საუბრობდნენ.

კერძოდ, გიორგი შარაშიძემ „ქართული ოცნების“ დეპუტატებს უთხრა, რომ „კადრები, რაც ვიხილეთ, არაფრით განსხვავდება იმისგან, რასაც ადგილი ჰქონდა „ნაციონალური მოძრაობის“ რეჟიმის დროს - რაც გუშინ ვნახეთ, ეს არის „ნაცობა“.

მას გამოეხმაურა იურიდიულ საკითხთა კომიტეტის თავმჯდომარე, არჩილ გორდულაძე, რომელმაც გახარიას პარტიაში მყოფ „ყოფილ ნაცებზე“ მიუთითა.

დავით მათიკაშვილმა კი გიორგი შარაშიძეს პროვოკატორი უწოდა.

შარაშიძეს ტონის დაწევისკენ მიუთითა „ქართული ოცნების“ დეპუტატმა, გიორგი სოსიაშვილმა.

„მე გადავწყვეტ, როდის გავჩერდები და როდის დავბრუნდები ჩემს ადგილზე“, - უპასუხა შარაშიძემ.