ლევან მახაშვილი: დღეს არსებითად შედგა შეთანხმება, რომ შემდეგი ათწლეულების განმავლობაში ამ რკინიგზებმა, ნავთობსადენებმა, გაზსადენებმა გამართულად იმუშაოს
დღეს არსებითად შედგა შემდგომი ათწლეულების შეთანხმება, რომ შემდეგი ათწლეულების განმავლობაში ამ რკინიგზებმა, ნავთობსადენებმა, გაზსადენებმა იმუშაოს გამართულად, - განაცხადა ევროპასთან ინტეგრაციის კომიტეტის თავმჯდომარე ლევან მახაშვილმა აზერბაიჯანში, საქართველო-აზერბაიჯანს შორის გაფორმებული შეთანხმებების შეფასებისას.
მისი თქმით, დღევანდელ შეთანხმებებს ახალი სტრატეგიული განაცხადი შეიძლება ეწოდოს.
„ამ გადაწყვეტილებებზე საუბარი, შეთანხმება რამდენიმე თვის განმავლობაში მიმდინარეობდა. ორივე მხარე მაქსიმალურად მობილიზებული ვიყავით, უპირველესად ხელისუფლებები, რომ ეს გადაწყვეტილებები ნამდვილად მიღებულიყო საერთო ინტერესის გათვალისწინებით. საზოგადოებამ დღეს უკვე ფართოდ იცის შუა დერეფნის პოზიცია, ისტორიული აბრეშუმის გზა, როგორც ეს ადრე ერქვა საუკუნეების განმავლობაში, რაც ნიშნავს რას, რომ დასავლეთი და აღმოსავლეთი, ჩრდილოეთი და სამხრეთი ერთმანეთს უკავშირდებოდეს სავაჭრო გზით და დღეს საკვანძო კომპონენტი გადის სწორედ აზერბაიჯან-საქართველოზე. ეს სავაჭრო კორიდორი, შუა დერეფენი არ არის უბრალოდ ცარიელი სიტყვები, ფურცელზე დაწერილი რაღაც კონცეფცია. ეს შედეგები კონკრეტული ინიციატივებისგან, ინფრასტრუქტურისგან შედგება. ეს გადაწყვეტილებები, რაც დღეს ოფიციალურად შეთანხმდა და უკვე გაფორმდა არის უმნიშვნელოვანესი, რადგან ფაქტობრივად ახალი სტრატეგიული განაცხადი გაკეთდა და ეს არის იმ მასშტაბის გადაწყვეტილებები, როგორიც 90-იან წლებში საქართველო-აზერბაიჯანს შორის გაკეთდა და როცა დაიწყო მშენებლობა ნავთობსადენების, გაზსადენების. დღეს არსებითად შემდგომი ათწლეულების შეთანხმებები შედგა, რომ შემდეგი ათწლეულების განმავლობაში ამ რკინიგზებმა, ნავთობსადენებმა, გაზსადენებმა იმუშაოს გამართულად იმისთვის, რომ ჩვენი ეკონომიკა აქტიურად მუშაობდეს და ჩვენი მოსახლეობის კეთილდღეობისთვის ფუნდამენტურად მეტი რესურსი შემოვიდეს ქვეყანაში“, - აღნიშნა მახაშვილმა.
მისივე თქმით, რთული იყო ეს მოლაპარაკებები, მაგრამ ორივე ქვეყანა ძალიან მოწადინებული იყო და რაღაცები გადადო გვერდზე და მიიღო ეს გადაწყვეტილებები, რომელიც ამ ისტორიული შანსის გამოყენებას, მსოფლიოს სხვადასხვა კუთხეების დაკავშირებას ემსახურება.
