ლევან მახაშვილი კანონის უზენაესობის მედეგობის შეფასებაზე: ეს არის სამაგალითო კვლევა, შედეგები და რაც მთავარია, სამაგალითო პასუხი იმ უსაფუძვლო ბრალდებებზე, რაც გვესმის ხოლმე მათ შორის, ბრიუსელის მხრიდან

საქართველოს პარლამენტის ევროპასთან ინტეგრაციის კომიტეტის თავმჯდომარე ლევან მახაშვილი კანონის უზენაესობის მედეგობის შესახებ ევროპული პოლიტიკის ინსტიტუტის კვლევას აფასებს. მისი თქმით, ამ კვლევის შედეგი არის პასუხი უსაფუძვლო ბრალდებებზე საქართველოს ხელისუფლების მიმართ.

„ეს არის სამაგალითო კვლევა, შედეგები და რაც მთავარია, სამაგალითო პასუხი იმ უსაფუძვლო ბრალდებებზე, რაც გვესმის ხოლმე მათ შორის, ბრიუსელის მხრიდან. ეს კვლევა კიდევ ერთხელ ადასტურებს, რომ ეს ბრალდებები არის უსაფუძვლო და მხოლოდ პოლიტიკური მიზნებით ნაკარნახევი. რა იყო პოლიტიკური ინტერესი, ეს საზოგადოებამ ძალიან კარგად ნახა გასული წლების განმავლობაში. მათი მიზანი იყო ხელისუფლების შეცვლა და საქართველოს ხელისუფლებაში ისეთი ძალების ყოფნა, რომლებიც მათ დაკრულზე იცეკვებდნენ”, -განაცხადა ლევან მახაშვილმა.

ევროკავშირის კანდიდატ ქვეყნებში კანონის უზენაესობის მედეგობის შეფასება გამოქვეყნდა. ევროპული პოლიტიკის ინსტიტუტის შედეგებით, საქართველოსა და მონტენეგროს უმაღლესი შესრულება აქვთ. დანარჩენი კანდიდატი ქვეყნები კი საქართველოსა და მონტენეგროს ჩამორჩებიან.