ლევან მახაშვილი: პოლიტიკოსების არასწორმა პოლიტიკამ, ნაბიჯებმა და გადაწყვეტილებებმა გამოიწვია ის, რომ ევროპის ბევრი სახელმწიფო სხვადასხვა ტიპის ტერორისტული საქმიანობებისთვის ნოყიერი ნიადაგი გახდა

პოლიტიკოსების არასწორმა პოლიტიკამ, ნაბიჯებმა და გადაწყვეტილებებმა გამოიწვია ის, რომ ევროპის ბევრი სახელმწიფო სხვადასხვა ტიპის ტერორისტული საქმიანობებისთვის ნოყიერი ნიადაგი გახდა, - განაცხადა ლევან მახაშვილმა აშშ-ის ახალი ანტიტერორისტული სტრატეგიის, 16-გვერდიან დოკუმენტის შეფასებისას.

პარლამენტის ევროპასთან ინტეგრაციის კომიტეტის თავმჯდომარის თქმით, აღნიშნული დოკუმენტი ბევრი პოლიტიკოსისთვის საყურადღებო უნდა იყოს.

„მათ შორის, ჩვენთვისაც საყურადღებო უნდა იყოს, რომ არ დავუშვათ იგივე შეცდომები, რაც ზოგიერთმა ევროპულმა სახელმწიფომ დაუშვა. საბედნიეროდ, საქართველოში დღევანდელი მდგომარეობა ბევრად უკეთესია და მსგავსი ტიპის ანგარიშებში ხაზია გასმული, რომ უსაფრთხოების ნაწილში განსაკუთრებით, ტერორიზმთან ბრძოლის ნაწილში, საქართველო კარგ მდგომარეობაშია“, - განაცხადა მახაშვილმა.

აშშ-ის ახალი ანტიტერორისტული სტრატეგიის 16-გვერდიან დოკუმენტში ყველაზე მკაცრი შეფასებები ევროპას ეკუთვნის - ანგარიშში ნათქვამია, რომ ევროპა ტერორიზმის სერიოზული საფრთხის წინაშე დგას, ერთდროულად ტერორიზმის სამიზნეცაა და ტერორისტული საფრთხის წარმოშობის ადგილიც, რის მიზეზადაც უკონტროლო მიგრაცია სახელდება. ეროვნული სტრატეგიის ანგარიშში ტრამპის ადმინისტრაცია ევროპას სასწრაფო მოქმედებისკენ მოუწოდებს.