ლიეტუვაში საგარეო საქმეთა მინისტრის გადადგომაზე ალაპარაკდნენ. პრეზიდენტი აღნიშნულ ინფორმაციას უარყოფს

ლიეტუვის პრეზიდენტი გიტანას ნაუსედა ქვეყნის საგარეო საქმეთა მინისტრის კიასტუტის ბუდრისის თანამდებობიდან გადადგომის შესახებ ინფორმაციას უარყოფს. ინფორმაციას ლიეტუვური მედია ავრცელებს.

აღსანიშნავია, რომ რამდენიმე დღის წინ ლიეტუვურმა მედიამ გაავრცელა ცნობა იმის შესახებ, რომ ქვეყნის მმართველ კოალიციაში ბუდრისით უკმაყოფილოები არიან. ლიეტუვის პარლამენტის დეპუტატი ლიგიტა გირსკენე აცხადებდა, რომ ბუდრისი დამოუკიდებლად მოქმედებს და თავის გადაწყვეტილებებს ქვეყნის პრემიერ-მინისტრთან ინგა რუგინენესთან არ ათანხმებს.

ლიეტუვის პრეზიდენტის განცხადებით, საგარეო საქმეთა მინისტრის წინააღმდეგ კონკრეტული ბრალდებები არ გაჟღერებულა, ხოლო ადამიანები, რომლებიც ცილისწამებით არიან დაკავებულნი, ამას ანონიმურად აკეთებენ.

„ახლა საუბარი ერთ კონკრეტულ მინისტრზე არის უპასუხისმგებლო და ძალიან არასერიოზული რამ, მით უმეტეს, რომ მის წინააღმდეგ არანაირი კონკრეტული, ხელშესახები ბრალდება არ გაჟღერებულა“, - განაცხადა ნაუსედამ.