მაკა ბოჭორიშვილი: ხშირად ვხვდებით ევროკავშირის წევრი ქვეყნების წარმომადგენლებს, რომლებიც არ ფიქრობენ ისე და არ იზიარებენ იმ პოზიციებს, რაც ჩვენ ბრიუსელის ინსტიტუტებიდან გვესმის
საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა გადაცემაში „დღის ქრონიკა“ ევროკავშირში უფლებამოსილებების გადანაწილებასთან დაკავშირებით მიმდინარე დისკუსიაზე ისაუბრა. კერძოდ, მინისტრი გამოეხმაურა საგარეო პოლიტიკისა და უსაფრთხოების საკითხებში ევროკავშირის ყოფილი უმაღლესი წარმომადგენლის ჯოზეფ ბორელის კრიტიკას ევროკომისიის მიმართ, რომლის თანახმადაც ევროკომისია გასცდა მისთვის მინიჭებულ მანდატს.
მაკა ბოჭორიშვილის შეფასებით, ბრიუსელსა და ევროკავშირის წევრ ქვეყნებს შორის უფლებამოსილებების განაწილების საკითხი წლების განმავლობაში განხილვის საგანია, ამასთან, სულ უფრო ხშირად ისმის კრიტიკა ევროკავშირის საგარეო ქმედებათა სამსახურის საქმიანობის მიმართ.
„ძალიან ხშირად, განსაკუთრებით ბოლო პერიოდში არის ამაზე წუხილები და საუბრები, რომ უფრო მეტს აკეთებს ბრიუსელი, ვიდრე მას ამის უფლებამოსილება აქვს ევროკავშირის წევრი ქვეყნებისგან მინიჭებული. მეორე მხრივ, ამ პროცესების მონაწილე არიან ევროკავშირის წევრი ქვეყნები და მათი საქმეა, თუ როგორ გადაანაწილებენ საქმეს ევროკომისიასა და ევროკავშირის წევრ ქვეყნებს შორის და თუ როგორი იქნება სუვერენული უფლებამოსილების ხაზები. ცხადია, რომ ბოლო პერიოდში ევროკავშირის საგარეო ქმედებათა სამსახურის საქმიანობით უკმაყოფილება ბევრი მიმართულებიდან ისმის, მათ შორის წევრი ქვეყნებიდანაც, ინსტიტუტებიდანაც და ვნახოთ, ეს არ არის ახალი პროცესი, მუდმივად ახასიათებს ბრიუსელს ასეთი განხილვები, თუმცა, რა თქმა უნდა, მეტი დამაჯერებლობისთვის უმჯობესი იქნებოდა, რომ საგარეო პოლიტიკაც იმ ჩარჩოებში იყოს ნაწარმოები, რაც ჩარჩოებიც ევროკავშირის წევრ ქვეყნებს აქვთ განსაზღვრული და ძალიან მნიშვნელოვანია ესეც იყოს დაცული,“ - განაცხადა მაკა ბოჭორიშვილმა.
მინისტრმა აღნიშნა, რომ საქართველოს შემთხვევაშიც იკვეთება განსხვავებები ევროკავშირის ინსტიტუტებისა და წევრი ქვეყნების წარმომადგენლების პოზიციებს შორის.
