მაკა ბოჭორიშვილი პრემიერ-მინისტრის ყირგიზეთში ვიზიტთან დაკავშირებით: ეს კარგი შესაძლებლობაა, რომ ორ ქვეყანას შორის სხვადასხვა მიმართულებით ურთიერთობები განვითარდეს და უფრო გაღრმავდეს
ყირგიზეთში ვიზიტის ფარგლებში, საქართველოს ვიცე-პრემიერმა, საგარეო საქმეთა მინისტრმა, მაკა ბოჭორიშვილმა მედიასთან კომენტარი გააკეთა, სადაც ყირგიზეთში პრემიერ-მინისტრის ვიზიტთან დაკავშირებით ისაუბრა.
„პრემიერ-მინისტრის ვიზიტი ყირგიზეთში ისტორიულია იმ თვალსაზრისით, რომ არასდროს ყოფილა მაღალი დონის ვიზიტი საქართველოდან ყირგიზეთში. რა თქმა უნდა, ეს კარგი შესაძლებლობაა, რომ ორ ქვეყანას შორის სხვადასხვა მიმართულებით ურთიერთობები განვითარდეს და უფრო გაღრმავდეს,“ - განაცხადა მაკა ბოჭორიშვილმა.
საგარეო უწყების ხელმძღვანელმა ვიზიტის ფარგლებში გამართული შეხვედრები შეაჯამა.
„შევხვდი ჩემს კოლეგას, ვისაუბრეთ ორმხრივი ურთიერთობების დინამიკაზე და შესაძლებლობებზე, რაც არსებობს თანამშრომლობის სხვადასხვა მიმართულებით. გაფორმდა რამდენიმე შეთანხმება, რაც ეხება სხვადასხვა მიმართულებით თანამშრომლობას, ასევე პროგრამა, რომელიც მომდევნო წლების განმავლობაში განსაზღვრავს ჩვენს ქვეყნებს შორის თანამშრომლობას,“ - აღნიშნა მაკა ბოჭორიშვილმა.
მინისტრის განცხადებით, ორ ქვეყანას შორის სამომავლო თანამშრომლობის დიდი პოტენციალი არსებობს და მხარეებს შორის გაგრძელდება მუშაობა არსებული შესაძლებლობების მაქსიმალურად გამოყენებისთვის.
„პოტენციალი ნამდვილად არის, დაინტერესება არის განსაკუთრებით „შუა დერეფნის“ კონტექსტში, სატრანსპორტო და ლოგისტიკური კავშირების განვითარების, ასევე ეკონომიკური და სავაჭრო ურთიერთობების კუთხით. ეს შესაძლებლობები მაქსიმალურად უნდა გამოვიყენოთ ჩვენი ქვეყნის სასიკეთოდ და ამ მიმართულებით უნდა გაგრძელდეს მუშაობა ყირგიზულ მხარესთან“ - განაცხადა საგარეო საქმეთა მინისტრმა.
იმედი
წყარო: imedinews.ge