მედია: გერმანიაში გამოკითხულთა თითქმის ნახევარს მმართველი კოალიციის დაშლა სურს

გერმანიის მოსახლეობის 47%-ს მმართველი კოალიციის დაშლა და ვადამდელი საპარლამენტო არჩევნების დანიშვნა სურს. გამოკითხვის შედეგებს გერმანული მედია ავრცელებს.

გამოკითხვის თანახმად, კოალიციის დაშლის მსურველთაგან 38%-ს ვადამდელი საპარლამენტო არჩევნების დანიშვნა სურს, 9%-ს - ახალი კოალიციისა და უმცირესობის მთავრობის ფორმირება, რომელიც „ქრისტიან-დემოკრატიული“ და „ქრისტიან-სოციალისტური“ კავშირებისგან იქნება შექმნილი.

ამასთან ერთად, გამოკითხულთა 30% მმართველი კოალიციის შენარჩუნებას ემხრობა, ხოლო 24%-მა კითხვაზე პასუხი არ იცის.

როგორც გერმანული მედია აღნიშნავს, გერმანიის მოქმედმა კანცლერმა, ფრიდრიხ მერცმა, რომელიც „ქრისტიან-დემოკრატიულ“ კავშირს წარმოადგენს, კოალიციიდან გასვლა და უმცირესობის მთავრობის შექმნა გამორიცხა.