ნეთანიაჰუ: ისრაელის ბრძოლები არასოდეს მთავრდება - კიდევ ბევრი სამუშაოა ირანის მიერ მართულ ღერძთან გასამკლავებლად

ისრაელის პრემიერ-მინისტრმა, ბენიამინ ნეთანიაჰუმ Channel 14-თან ინტერვიუში ისრაელის ბოლო წლების სამხედრო მიღწევები შეაფასა და აღნიშნა, რომ მიუხედავად „უზარმაზარი წარმატებებისა“, ქვეყნისთვის გამოწვევები კვლავ არსებობს.

ინტერვიუს დროს პრემიერმა ხაზგასმით აღნიშნა, რომ ისრაელის ბრძოლები რეგიონში „არასოდეს მთავრდება“ და ქვეყანამ უნდა შეინარჩუნოს მაქსიმალური სიმტკიცე.

ნეთანიაჰუს თქმით, ისრაელი უფრო ძლიერია, ვიდრე ოდესმე და ქვეყანამ შეძლო ირანის, „ჰამასისა“ და „ჰეზბოლას“ მხრიდან მომდინარე საფრთხეების უკუგდება და მნიშვნელოვნად შესუსტება.

მან ხაზი გაუსვა იმას, რომ ირანული ღერძის ნარჩენებთან გამკლავება კვლავ დღის წესრიგში დგას. პრემიერის განცხადებით, სამხედრო მოქმედებების პარალელურად, ისრაელი ეძებს შესაძლებლობებს სამშვიდობო შეთანხმებების გასაფორმებლად.

აღსანიშნავია, რომ ეს განცხადება კეთდება ლიბანთან გაფორმებული ჩარჩო-შეთანხმების ფონზე, რომელიც ისრაელის ძალების ეტაპობრივ გაყვანას და ურთიერთობების ნორმალიზებას ისახავს მიზნად, მაშინ როდესაც „ჰეზბოლასთან“ შეიარაღებული დაპირისპირება კვლავ გრძელდება.

„თუ გსურთ იცხოვროთ ახლო აღმოსავლეთში - და ზოგადად მსოფლიოში - უნდა იყოთ ძალიან ძლიერები“, - დასძინა ნეთანიაჰუმ ინტერვიუში.