ნინო ლაცაბიძე: რუსთავის ჭალის ტყეების აღდგენა-განაშენიანების პროცესმა საყოველთაო ხასიათი მიიღო

რუსთავის ჭალის ტყის აღდგენა-განაშენიანების პროექტის ფარგლებში, მასშტაბური გამწვანების აქციები აქტიურად გრძელდება და უკვე საყოველთაო ხასიათი მიიღო, - აღნიშნულია რუსთავის მერიის მიერ გავრცელებულ ინფორმაციაში.

მათივე განცხადებით, მორიგ ეკო აქციაში ახალგაზრდებთან ერთად, რუსთაველმა სპორტსმენებმა მიიღეს მონაწილეობა. მანამდე კი ჭალის ტყეში ნერგები, გიგა ლორთქიფანიძის სახელობის რუსთავის თეატრის მსახიობებმა დარგეს.

ჭალის ტყეები, მტკვრის ორივე სანაპიროზე, ძველი და ახალი რუსთავის დამაკავშირებელ ხიდს შორის არსებული სივრცეა, რომელიც ქალაქისთვის უმთავრეს ეკოლოგიურ რესურსს წარმოადგენს.

„რუსთავის ჭალის ტყეების აღდგენა-განაშენიანების პროცესმა საყოველთაო ხასიათი მიიღო. რამდენიმე დღის წინ, ამ უმნიშვნელოვანეს პროექტში ჩასართავად, ჩვენი საამაყო სპორტსმენებიც გაერთიანდნენ. მადლობა მათ და ყველას, ვინც რუსთავის მომავალზე, მის ეკოლოგიაზე ზრუნვას საკუთარ საქმედ მიიჩნევს”, - განაცხადა რუსთავის მერმა ნინო ლაცაბიძემ.

რუსთავის ჭალის ტყის განვითარების გეგემა, 320 ჰა ტერიტორიის განაშენიანებას ითვალისწინებს. პროექტის ფარგლებში მიმდინარე წლის გაზაფხულზე 10 000 ენდემური ხე-მცენარე დაირგვება. ტერიტორიის აღდგენა-განაშენიანების გეგმის ფარგლებში კი ჯამში 20 000 ძირი მუხის, თელასა და ფშატის დარგვაა გათვალისწინებული.

პროექტის ფარგლებში რუსთავის ჭალის ტყის ტერიტორიაზე მოეწყობა ტურისტული ინფრასტრუქტურა და საინფორმაციო სივრცეები, დამონტაჟდება ფრინველებზე და ცხოველებზე დაკვირვებისთვის საჭირო ფოტოხაფანგები და სპეციალური ბარიერები მდინარე მტკვრის დაბინძურების თავიდან ასაცილებლად.

რუსთავის ჭალის ტყის განვითარების გეგმა, საქართველოს გარემოს დაცვის და სოფლის მეურნეობის სამინისტრომ და რუსთავის მერიამ, პროექტის - „გადავარჩინოთ ბუნება - საქართველოს“ ფარგლებში შეიმუშავა. პროექტი, გარემოსდაცვითი ფონდიდან ფინანსდება.