ნინო თანდილაშვილი: შეიქმნა ეროვნული მობილური პლატფორმა, რომლის საშუალებითაც ავტომატურ რეჟიმში მოხდება გაფრთხილებების გაცემა და ყველა მოქალაქეს შეეძლება რომ ისარგებლოს ამ საჯარო სერვისით. პლატფორმის საჯარო წარდგენა უახლოეს მომავალში მოხდება
საქართველო მასპინძლობს მსოფლიო მეტეოროლოგიური ორგანიზაციის მნიშვნელოვან ღონისძიებას, ეს არის ორგანიზაცია, რომელიც საერთაშორისო დონეზე არის პასუხისმგებელი ადრეული გაფრთხილების სისტემების განვითარებაზე და ხაზი მინდა გავუსვა, რომ ამ ორგანიზაციამ ძალიან დადებითად შეაფასა საქართველოს მთავრობის მიერ ბოლო წლების განმავლობაში განხორციელებული ის აქტივობები, რასაც ჩვენ ადრეული გაფრთხილების სისტემებს განვითარების კუთხით ვაკეთებთ, - განაცხადა გადაცემაში „დღის ქრონიკა“ გარემოს დაცვისა და სოფლის მეურნეობის მინისტრის მოადგილემ, ნინო თანდილაშვილმა.
მისივე თქმით, დღეს საქართველოს მასშტაბით 278 მეტეო სადგურია აღჭურვილი თანამედროვე რადარებით და თანამედროვე ეფექტიანი სისტემით ამინდის პროგნოზირებისთვის. შეიქმნა ეროვნული მობილური პლატფორმა, რომლის საშუალებითაც ავტომატურ რეჟიმში მოხდება გაფრთხილებების გაცემა და ყველა მოქალაქეს შეეძლება რომ ისარგებლოს ამ საჯარო სერვისით. პლატფორმის საჯარო წარდგენა უახლოეს მომავალში მოხდება.
„მომდევნო წლის ბოლომდე ჩვენ გვექნება დაახლოებით 300 სადგური ქვეყნის მასშტაბით და ეს პროცესი კიდევ გაგრძელდება და ეს ნიშნავს იმას, რომ მსოფლიო მეტეოროლოგიური ორგანიზაციის სტანდარტების შესაბამისად ჩვენ გვექნება ყველა იმ წერტილში მონიტორინგის სადგურები დაყენებული, საიდანაც მნიშვნელოვანია, რომ ვიღებდეთ ინფორმაციას სტიქიური პროცესების შესახებ.
ჩვენი ეროვნული მობილური პლატფორმა გაფრთხილებებს გააგზავნის ძალიან ხშირი ინტენსივობით და მათი განახლება მოხდება ძალიან ხშირად. ეს ყველაფერი ჩვენ გვაძლევს საშუალებას, რომ ჩვენი ამინდის პროგნოზი და მოსალოდნელი სტიქიური მოვლენების შესახებ ინფორმაცია და გაფრთხილებები იყოს მაქსიმალურად ზუსტი და მაქსიმალურად ლოკალიზებული“, - აღნიშნა ნინო თანდილაშვილმა.
