POLITICO: ადამიანის უფლებათა ევროპული სასამართლოდან (ECHR) გამოსვლა ბრიტანეთს რუსეთის გზაზე დააყენებს

ევროპის საბჭოს გენერალური მდივნის, ალენ ბერსეს განცხადებით, დიდი ბრიტანეთის მიერ ევროპული კონვენციის დატოვება ქვეყანას რუსეთისა და ბელარუსის ავტოკრატიული რეჟიმების რიგებში ჩააყენებს. ინფორმაციას POLITICO ავრცელებს.

ლონდონში ვიზიტისას, POLITICO-თან საუბრისას, ბერსემ განაცხადა, რომ ბრიტანეთი შედეგებს მოიმკის, თუ ის დატოვებს ადამიანის უფლებათა დაცვის რეგიონულ ჩარჩო შეთანხმებას, რომელიც თავად 1950 წელს სხვა ქვეყნებთან ერთად დააარსა.

როგორც POLITICO აღნიშნავს, ქვეყნის ორი წამყვანი მემარჯვენე ოპოზიციური პოლიტიკური გაერთიანება - „კონსერვატორები“ (Tories) და „რეფორმის“ პარტია მომავალ საპარლამენტო არჩევნებში გამარჯვების შემთხვევაში ECHR-დან გასვლას გეგმავს. ისინი ამ ნაბიჯის აუცილებლობას მიგრაციის მართვისას შექმნილი სირთულეებით ამართლებენ.

ევროპის საბჭოს გენმდივნის განცხადებით, საბოლოო ჯამში დიდი ბრიტანეთის გადასაწყვეტია, დატოვებს, თუ არა შეთანხმებას.

„კონვენციიდან გამოსვლა აბსოლუტურად შესაძლებელია. ეს თქვენი გადასაწყვეტია. მაგრამ, რას ნიშნავს ეს? ეს შექმნის ევროპული ქვეყნების ახალ ჯგუფს, რომლებიც ევროპის საბჭოს წევრები არ იქნებიან და კონვენციის მოთხოვნებს არ შეასრულებენ: რუსეთი, ბელარუსი და დიდი ბრიტანეთი. ასეთი შედეგები იქნება“, - თქვა ბერსემ.