POLITICO: ირანის ომის დაწყებიდან თითქმის ორი თვის თავზე, ტრამპის ყურადღებამ ახლო აღმოსავლეთისადმი უკრაინა თეთრ სახლში მეორეხარისხოვან საკითხად აქცია
ირანის ომის დაწყებიდან თითქმის ორი თვის თავზე, ტრამპის ყურადღებამ ახლო აღმოსავლეთისადმი უკრაინა თეთრ სახლში მეორეხარისხოვან საკითხად აქცია, - წერს გამოცემა POLITICO.
„პროცესი თითქოს გაიჭედა და ახალი იმპულსია საჭირო“, - განაცხადა ევროპელმა მაღალჩინოსანმა, რომელმაც POLITICO-ს სტატიისთვის გამოკითხული სხვა პირების მსგავსად ანონიმურობის პირობით ისაუბრა.
„თუმცა, ბოლო 24-მა საათმა დაადასტურა, რომ ეს სულ უფრო მეტად ემსგავსება ფუჭ იმედებს - რომ ტრამპი, ამ მომენტში, უფრო მეტად დაინტერესებულია ევროპული სახელმწიფოების გაკრიტიკებითა და, შესაძლოა, დასჯითაც კი, ვიდრე მათთან ერთობლივი მუშაობით“, - ნათქვამია სტატიაში.
ოთხშაბათს ტრამპმა სოციალურ ქსელში გააკრიტიკა გერმანიის კანცლერი, შოკში ჩააგდო პენტაგონი ევროპის სამ ქვეყანაში ამერიკული სამხედრო კონტინგენტის შემცირების მუქარით და ხანგრძლივი სატელეფონო საუბარი გამართა ვლადიმირ პუტინთან, რომლის დროსაც ისინი მოკლევადიან ცეცხლის შეწყვეტაზე უკრაინასთან კონსულტაციის გარეშე შეთანხმდნენ.
„მაშინ, როცა პრეზიდენტი და მისი გუნდი მუშაობენ შეთანხმებაზე, რომელიც უზრუნველყოფს, რომ ირანმა ვერასდროს შეძლოს ბირთვული იარაღის ფლობა, ისინი ასევე განაგრძობენ წინსვლას რუსეთსა და უკრაინას შორის ომის დასასრულებლად“, - აღნიშნა თეთრი სახლის პრესსპიკერმა, ოლივია უელსმა. „პრეზიდენტი კვლავ ოპტიმისტურად არის განწყობილი, რომ საბოლოოდ შედგება სამშვიდობო შეთანხმება უკრაინასა და რუსეთს შორის, რათა დასრულდეს ეს მკვლელობები“.
თუმცა, თეთრ სახლში უკრაინის საკითხზე ხმა აშკარად ჩაახშეს. პუტინთან ტრამპის სატელეფონო საუბრამდე, თეთრი სახლის მაღალჩინოსანმა აღნიშნა, რომ ვერც კი იხსენებდა, ბოლოს როდის მოისმინა ვინმესგან რუსეთ-უკრაინის კონფლიქტზე საუბარი.
„ირანი ნამდვილად იქცა მთავარ ფოკუსად“, - განაცხადა მაღალჩინოსანმა, რომელსაც ანონიმურობის უფლება მიეცა იმ თემების განსახილველად, რომლებზეც საჯაროდ საუბრის უფლებამოსილება არ ჰქონდა.
