პოლონეთის პარლამენტის წევრი: ევროკავშირში უკრაინის ადგილი არ არის, თუ მის დროშებზე OUN-UPA-ს დამნაშავეების კულტი იქნება - სწორედ ამიტომ წარვადგინე სეიმში რეზოლუციის პროექტი, რომელიც მთავრობას ავალდებულებს, დაბლოკოს უკრაინის ევროკავშირში გაწევრიანების პროცესი

პოლონეთის პარლამენტის წევრმა (პარტია „კანონი და სამართლიანობა“) და განათლების ყოფილმა მინისტრმა, პშემისლავ ჩარნეკმა უკრაინის ევროკავშირში გაწევრიანების პროცესის შეჩერების მოთხოვნით სეიმში სპეციალური რეზოლუციის პროექტი წარადგინა.

„ევროკავშირში უკრაინის ადგილი არ არის, თუ მის დროშებზე OUN-UPA-ს დამნაშავეების კულტი იქნება! სწორედ ამიტომ წარვადგინე სეიმში რეზოლუციის პროექტი, რომელიც მთავრობას ავალდებულებს, დაბლოკოს უკრაინის ევროკავშირში გაწევრიანების პროცესი“, - განაცხადა მან.

კონფლიქტის მთავარ მიზეზს უკრაინელ ნაციონალისტთა ორგანიზაციისა და უკრაინის ამბოხებულთა არმიის (OUN-UPA) წევრების მიმართ უკრაინის დამოკიდებულება წარმოადგენს. ჩარნეკი ამტკიცებს, რომ პოლონელების მკვლელების განდიდება და ვოლინის ხოცვა-ჟლეტის დამნაშავეების პოპულარიზაცია კატეგორიულად მიუღებელია პოლონეთისთვის.

მისი თქმით, სანამ უკრაინა ამ ისტორიულ საკითხებზე საკუთარ პოზიციას არ გადახედავს, პოლონეთის მთავრობამ ვეტო უნდა გამოიყენოს და დაბლოკოს მისი ევროინტეგრაცია.

„ეს დონალდ ტუსკისთვის გამოცდაა. დადგება თუ არა ის ისტორიული სიმართლისა და პოლონეთის ეროვნული ინტერესების მხარეს, თუ კვლავ აირჩევს დუმილს დამნაშავეების განდიდების წინაშე?“ - დასძინა მან.

TWITTER POST