პოლონეთის პრეზიდენტის კანცელარიაში უკრაინის რადის მიერ ეროვნული პანთეონის შექმნის შესახებ მიღებულ კანონს ესკალაციური ნაბიჯი უწოდეს

პოლონეთის პრეზიდენტის კაროლ ნავროცკის ადმინისტრაცია უკრაინის უმაღლესი რადის მიერ ეროვნული პანთეონის შექმნის შესახებ მიღებულ კანონს გამოეხმაურა და აღნიშნა, რომ ეს არის ესკალაციური ნაბიჯი.

„პრეზიდენტმა ზელენსკიმ ეროვნული პანთეონის შესახებ კანონპროექტის წარდგენა გამოაცხადა. ეს უკრაინის ხელისუფლების კიდევ ერთი ესკალაციური ნაბიჯია, მაისის ბოლოს მიღებული გადაწყვეტილების შემდეგ, რომლის თანახმადაც ერთ-ერთ სამხედრო ქვედანაყოფს „უკრაინის მეამბოხე არმიის გმირების“ სახელი მიენიჭა.

ეს ქმედებები აჩვენებს, რომ პრეზიდენტი ნავროცკი მართალი იყო, როდესაც ასეთ მტკიცე პოზიციას იკავებდა, კერძოდ, როდესაც განაცხადა, რომ „თეთრი არწივის“ ორდენს [ზელენსკის] ჩამოართმევდა და საბოლოოდ პოლონეთმა ეს უმაღლესი სახელმწიფო ჯილდოც დაიბრუნა“, - აღნიშნულია განცხადებაში.

ცნობისთვის, დღეს უკრაინის უმაღლესმა რადამ ხმათა უმრავლესობით ქვეყნის ეროვნული პანთეონის შექმნის შესახებ კანონი მიიღო. პანთეონში იქნება აგრეთვე სახელმწიფო მემორიალური კომპლექსი, სადაც დაკრძალავენ გამოჩენილ უკრაინელ მოღვაწეებს, პრეზიდენტებისა და ქვეყნის დამოუკიდებლობისთვის მებრძოლების ჩათვლით. მედიაში ვრცელდება ინფორმაცია, რომ ახალ მემორიალში, შესაძლოა, გადაასვენონ სიმონ პეტლიურას და სტეპან ბანდერას ნეშტებიც. აღსანიშნავია, რომ ბანდერას ფიგურას პოლონეთში ნეგატიურად აფასებენ. პოლონელები ამტკიცებენ, რომ ბანდერა ვოლინის ტრაგედიასთან არის კავშირში, შესაბამისად, მისი განდიდება მიუღებელია.