ფოთის მერი: საერთაშორისო საჭადრაკო ფესტივალი მოზარდებისთვის უნიკალური შესაძლებლობა იყო, ეთამაშათ მაღალი დონის მოჭადრაკეებთან, მიეღოთ ფასდაუდებელი გამოცდილება და კიდევ ერთი მნიშვნელოვანი ნაბიჯი გადაედგათ მომავალი წარმატებებისკენ
ფოთში XIX საერთაშორისო საჭადრაკო ფესტივალი „ნანა ალექსანდრიას თასი - 2026“ გაიმართა. ინფორმაციას ფოთის მერია ავრცელებს.
წელს ღონისძიებამ განსაკუთრებული მასშტაბი შეიძინა. ფესტივალში 530-მდე მოჭადრაკე მონაწილეობდა, ხოლო საპრიზო ფონდი 65 000 ლარს შეადგენდა.
საპრიზო ადგილებზე გასული მოჭადრაკეები ქალაქ ფოთის მერმა ბექა ვაჭარაძემ დააჯილდოვა.
,,ჩვენი ქალაქი კიდევ ერთხელ გახდა საერთაშორისო საჭადრაკო ფესტივალის მასპინძელი. ფესტივალი თავისი მასშტაბითა და მნიშვნელობით ფოთისთვის ერთ-ერთი გამორჩეული სპორტული ღონისძიებაა. მასში ქართველ მოჭადრაკეებთან ერთად საერთაშორისო დიდოსტატები და ოსტატებიც მონაწილეობენ.
ჩვენი მოზარდებისთვის კი ეს იყო უნიკალური შესაძლებლობა, ეთამაშათ მაღალი დონის მოჭადრაკეებთან, მიეღოთ ფასდაუდებელი გამოცდილება და კიდევ ერთი მნიშვნელოვანი ნაბიჯი გადაედგათ მომავალი წარმატებებისკენ.
ვულოცავ გამარჯვებულებს დამსახურებულ წარმატებას, ხოლო ყველა მონაწილეს მომავალშიც არაერთ გამარჯვებას და წინსვლას ვუსურვებ“-განაცხადა ფოთის მერმა ბექა ვაჭარაძემ.
საერთაშორისო საჭადრაკო ფესტივალი ქალაქ ფოთის მუნიციპალიტეტისა და საქართველოს ჭადრაკის ფედერაციის მხარდაჭერით გაიმართა. ღონისძიების ორგანიზატორია ფოთის საჭადრაკო კლუბი „ნანა“. ფესტივალს ფოთის მრავალფუნქციურმა საცურაო კომპლექსმა უმასპინძლა.
