Reuters: ნატო თავისი აღმოსავლეთ ფლანგის დაცვას გააძლიერებს ახალი სტრუქტურით, რომელიც რუსეთთან ომის შემთხვევაში ლატვიასა და ესტონეთში ძალების სწრაფ განლაგებას შეუწყობს ხელს

ნატო თავისი აღმოსავლეთ ფლანგის დაცვას გააძლიერებს ახალი სტრუქტურით, რომელიც რუსეთთან ომის შემთხვევაში ლატვიასა და ესტონეთში ძალების სწრაფ განლაგებას შეუწყობს ხელს. ინფორმაციას ამის შესახებ სააგენტო Reuters-ი ინფორმირებულ წყაროებზე დაყრდნობით ავრცელებს.

დაგეგმილი ცვლილება ხაზს უსვამს ბალტიისპირეთის სტრატეგიულ მნიშვნელობას, რომელიც ყურადღების ცენტრში რუსეთის მიერ უკრაინაში შეჭრის შემდეგ მოექცა.

რეგიონისთვის მეორე კორპუსის გამოყოფა ნატოს საშუალებას მისცემს უზრუნველყოს ძალების „მასშტაბური და სწრაფი“ მობილიზება, როგორც ეს ერთ-ერთმა სამხედრო მაღალჩინოსანმა აღწერა, რაც გადაჭრის რეგიონის შეზღუდული სტრატეგიული სიღრმისა და მოწყვლადობის პრობლემას.

სრულ საბრძოლო მზადყოფნაში ყოფნისას, არმიის კორპუსი, როგორც წესი, მეთაურობს სამ დივიზიას, ანუ 40 000-დან 60 000-მდე ჯარისკაცს. მშვიდობიანობის დროს ის, ჩვეულებრივ, შემოკლებული სამეთაურო სტრუქტურის სახით არსებობს, სადაც ისეთი სპეციალიზებული ქვედანაყოფები, როგორიცაა არტილერია, საჰაერო თავდაცვა და მედიკოსები, უკვე ადგილზეა განლაგებული, რათა საჭიროების შემთხვევაში ძალების სწრაფი მობილიზება მოხდეს.

გერმანიამ და ნიდერლანდებმა, ნატოსთან კოორდინაციით, მიაღწიეს შეთანხმებას, რომ გერმანიის ქალაქ მიუნსტერში ბაზირებული გერმანულ-ნიდერლანდური კორპუსი ლატვიისა და ესტონეთის დაცვისთვის გამოყონ.

ევროპელი მოკავშირეები მეტ პასუხისმგებლობას იღებენ საკუთარ უსაფრთხოებაზე დონალდ ტრამპის მხრიდან მწვავე კრიტიკის ფონზე, რომელმაც სულ ახლახან ნატოს ევროპელი წევრები ირანის ომში მხარდაჭერის ნაკლებობაში დაადანაშაულა და გამოაცხადა, რომ ვაშინგტონი გერმანიიდან 5 000 ამერიკელ ჯარისკაცს გაიყვანს.