Reuters: უკრაინამ რუსეთს შავ ზღვაში დროებითი ზავის დადება შესთავაზა

უკრაინამ რუსეთს შეთავაზება გაუგზავნა, რომლის მიხედვითაც ორივე მხარემ შავ ზღვაში სამოქალაქო ობიექტებზე თავდასხმები უნდა შეაჩეროს. ინფორმაციას Reuters-ი ინფორმირებულ წყაროზე დაყრდნობით ავრცელებს.

სააგენტოს ცნობით, ეს ნაბიჯი მას შემდეგ გადაიდგა, რაც შავ ზღვაში გემებსა და პორტებზე გახშირებულმა თავდასხმებმა სურსათის გლობალურ მარაგებს საფრთხე შეუქმნა.

წყარომ Reuters-ს განუცხადა, რომ თავდასხმების შეჩერების შესახებ შეთავაზება კიევმა მესამე მხარის მეშვეობით გადასცა მოსკოვს და უკრაინა პასუხს ჯერ კიდევ ელოდება.

რუსეთი და უკრაინა, რომლებიც მსოფლიო სასოფლო-სამეურნეო ბაზარზე მნიშვნელოვანი მოთამაშეები არიან, ერთმანეთს საექსპორტო გადაზიდვებისთვის გამოყენებულ გემებზე გახშირებულ თავდასხმებში ადანაშაულებენ.

ივლისის ბოლოს უკრაინა იძულებული გახდა ალტერნატიული საზღვაო მარშრუტებისთვის მიემართა მას შემდეგ, რაც ბევრმა გემთმფლობელმა ოდესის პორტებში, რომლებიც მარცვლეულის ექსპორტის უმნიშვნელოვანესი ჰაბია, შესვლა შეაჩერა. გადაწყვეტილება რუსული თავდასხმების შედეგად ათობით გემის დაზიანების შემდეგ მიიღეს.

თავის მხრივ, უკრაინის თავდასხმის შემდეგ რუსეთს ოთხშაბათსა და ხუთშაბათს შავი ზღვის პორტ ნოვოროსიისკში სამივე ტერმინალის ოპერაციების შეჩერება მოუწია. შედეგად, რუსეთს მარცვლეულის ექსპორტის კიდევ უფრო შემცირება მოუწევს.

რუსეთის საგარეო საქმეთა მინისტრის მოადგილემ ალექსანდრ გრუშკომ განაცხადა, რომ მოსკოვს შავ ზღვაში ცეცხლის შეწყვეტის შესახებ ოფიციალური შეთავაზება არ მიუღია.

რუსეთი არაერთხელ ცდილობდა უკრაინისთვის მნიშვნელოვანი საპორტო ოპერაციებისა და საზღვაო გადაზიდვების შეჩერებას, რომლებიც ომით მნიშვნელოვნად დაზარალებული უკრაინის ეკონომიკისთვის კრიტიკულ როლს ასრულებს, წერს Reuters-ი.

2022 წელს რუსეთის უკრაინაში შეჭრის შემდეგ გაერომ და თურქეთმა შეთანხმებას მიაღწიეს, რომლის შედეგადაც უკრაინიდან მარცვლეულის ექსპორტი გაგრძელდა და მოსალოდნელი გლობალური სასურსათო კრიზისის თავიდან აცილებას შეუწყო ხელი. 2023 წელს რუსეთმა შეთანხმების გაგრძელებაზე უარი თქვა.

ამის შემდეგ უკრაინამ საზღვაო გადაზიდვების ახალი მარშრუტი შექმნა, რომელიც ბოლო ესკალაციამდე ფუნქციონირებდა. უკრაინის განცხადებით, ალტერნატიული გზები, როგორც სარკინიგზო, ისე მდინარე დუნაის გავლით, უკიდურესად შეზღუდულია.